Guwahati, Nailar 05 : Ka iingbishar Gauhati high court ka la pynmih ia ka hukum ban pynduna ha kaba iadei bad ka jingdheng kali ha ka sorbah Guwahati ka Assam.
Kane ka jingpynmih hukum ka la wan long hadien ka jingpynsngew ia ka PIL ba la ujor da kawei ka briew ba la tip kyrteng kum ka Rita Das Mozumdar, ka ba ha ka jingujor ka la pynpaw kumno ba ka jingdheng kali ka la pynsahkut bad pynthut ia ka jinglong jingman ha kane ka sorbah.
Ka iingbishar ka la hukum na ka bynta ban thaw ia ka comittee jong ki laingut ki heh sorkar, ki ban pynkhreh ia ka kaiphot bishar bniah halor kane ka jingdheng kali ha ka sorbah Guwahati bad ban ai ruh ia ki jingmut na ka bynta kumno ban weng ia kane ka jingdheng kali ha kane ka sorbah.
Kine ki laingut ki dkhot ka committee kin kynthup ia u DCP (Traffic), Guwahati City, Deputy Municipal Commissioner, GMC bad u ophisar ba la jied da ka Assam State Legal Services Authority.
Nalor kata la kyntu ruh ia u transport secretary ka Assam, u Adil Hussain bad u IGP Nitul Gogoi ba kin ia don bynta lang kum ki nodal officer ha kane ka committee.
La kyntu ruh ia kane ka committee ba kan leit jurip ia ki surok bah, ki jaka iew bad kiwei pat ki jaka ha ka sorbah Guwahati ki ba dei ki jaka ki ba ngat khah khah ha ka jingdheng kali bad ba kin aijingmut halor ki lad ki lynti kumno ban lah ban weng ia kine ki jingeh ha ki ba kum kine ki jaka.
“Kine ki ophisar jong ka committee la ailad ruh ba kin shim ia ka jingiarap lem jong ki bor pulit ha ka ba iadei bad kane ka bynta, kata lada ka long ka ba donkam,” pynsngew ka iingbishar ha katei ka hukum.
Shuh shuh na ka liang ka iingbishar ka la hukum ia kane ka kynhun ba kan phah ia ka kaiphot halor kane ka bynta ha ka 22 tarik mynta u bnai.
