Shillong, Risaw 19 : Ka kynhun ialehkai U-17 Women’s Football Team ka Ri India kala thaw histori da ka jingioh rung sha ka AFC U-17 Women’s Asian Cup 2026, kaba pynkup ia ka jingap ba 21 snem jong ka Ri.
Kaba kham sngewtynnad ka long ba ha kane ka jingthaw histori, arngut ki samla ka Jylla Meghalaya kila iadon bynta hakhmat eh bad kine ki dei ka samla Bonifilia Shullai bad Alisha Lyngdoh, kiba la leh ia ka bynta kaba kongsan duh ban iarap ia ka India ba kan thaw ia kane ka hisoti.
Ka sap ialehkai jong ki, ka jingaiti lut ialade bad ka mynsiem ialeh ba ki don, kala pynlong ia ka Jylla bad ia ka Ri ba kan sngew sarong.
Lah ban kdew ba kine ki thei ialehkai kila iadonlang bad ka kynhun ialehkai U-17 ka Ri India, kaba ioh rah ia ka nam kum ka lahduh ha ka lympung ialehkai South Asian Football Federation (SAFF) ba dang shu kut dang shen ha Bhutan.
Kine ki arngut ki samla kila wan phai hynnin ka sngi Saitjain sha Jylla hadien ka jingiakhun ia ka AFC Qualifying Match ha Bishkek, da ka jingjop ba 2-1 kol ia ka Uzbekistan ban long ka lahduh ha ka Group G, bad ban ioh ia ka jaka ha kane ka lumpung ialehkai ba pawnam ka dewbah Asia.
Kum ka dak ka jingsngew burom ia ka nam ka burom ba kine ki thei samla kila wanrah ia ka Jylla, u Myntri Sorkar bad MLA ka South Shillong Constituency Bah Sanbor Shullai, ula pynkup burom ia kine ki samla ha ka jingialang kaba la pynlong ha ka sngi U Blei ha Orchid Lake Resort, Ri-bhoi.
Une u Myntri Sorkar ula ai sngewbha ia kine ki thei samla da ka song pisa ba mar T.50,000 lem bad ki momento bad ki jain kilan met, kaba ula thied na ka MLA Discretionary Grant.
Haba kren ha ka jingialang, u Bah Sanbor ula pyntip ba haba ioh jingtip ia ka jingwan phai jong kine ki thei ialehkai, mar mar ula pynbeit ban pynkup burom ia ki bad ula iakren ruh ia u Myntri Rangbah ka Jylla Conrad K Sangma, Symbud Myntri Rangbah Bah Prestone Tynsong bad u Myntri kam ialehkai ban pynkup burom ia ki.
“Nga pynkup burom ia ki mynta ym tang kum u Nongmihkhmat paidbah hynrei kum u Myntri ka Sorkar. U Myntri kam ialehkai ula aiktien ba ka Sorkar kan sa pynbeit kyrpang ia ka jingialang ban pynkup burom ia kine ki arngut ki thei ialehkai ka Jylla kiba mihkhmat ia ka Ri” ula ong.
Ula ong ba kum u MLA u ju ioh ia ka Discretionary Grant ba T.20 lak shisnem-kaba la ai sha ki MLA ba kin pyndon kam ha kino kino ki kam kiba kyrkieh bad ki bym lah ban tip lypa. “Nga ai khublei ia u Symbud Myntri Rangbah Bah Prestone Tynsong uba khmih ia ka Parliamentary Affairs, uba la ai jingmynjur ban pyllait ia ka song pisa ban iarap ia kine ki thei ialehkai”.
U Bah Sanbor ula kitbok kitrwiang ia kine ki thei ialehkai ba kin nang kiew shaphrang ha ka jingim jong ki bad ba kin nang wanrah shuh shuh ia ka nam ka burom ia ka Jylla bad ka Jaidbynriew baroh kawei.
