Thaw Committee ka Sorkar ban pynjem ia ka jingai permit ban tih marpoh khyndew

Shillong, Naiwieng 22: Ka Joint Action Committee kaba la khlieh da u Symbud Myntri Rangbah ka jylla u Bah Prestone Tynsong, kala shong ia ka jingialang kaba nyngkong hynne ka sngi Thohdieng ha Secretariat ban shimkhia bad ban pynjem ia ki Concession Rules jong ka Mines and Minerals (Development and Regulation) Act (MMDR Act) na ka bynta ki mar poh khyndew (minor minerals).

Haba iakren bad ki ladpathai khubor hadien ba la wai ka jingialang, u Bah Prestone Tynsong ula ong “Kane ka jingialang kaba kyrpang kaba la thung da ka Tnad Forest, ka don ia ka thong bad khmih bniah biang ia ki Rules kiba la don lypa hapoh jong ka MMDR Act. Ki mar poh khyndew kiba kynthup ia u shyiap bad ki maw kidei kiba la phaikhmat bha. Ka sorkar kala ithuh ia katei ka committee ban shimkhia ia kitei ki mat bad kane ka jingsdang jong ka jingialang ka pyni ia ka jingsdang jong ka jingiamir jingmut na ka bynta ban khmih bniah biang ia kitei ki Rules. Ngi lah dep ban pynbeit ban pynlong biang ia katei ka jingialang ha kaba ki tnad bapher kiba kynthup ia ka Forest, Mining bad Geology bad Law, la dep ban bthah ba kin khmih bniah shuh shuh ia kitei kiba la don lypa ban lap ia ki bynta ia kaba ngin lah ban pynsuk shuh shuh”.

Halor ka jingkylli ba ka don ka jingtih maw be-ain ha ka jylla, u Symbud Myntri Rangbah ula pyniasoh ia kane ka mat bad ka jingeh kaba mih na ka rukom ai lisen.

Ula batai “Ki kam be-ain kila jia ha ki shnong kiba don ia u shyiap ne par maw, ki mad ia ki jingeh ha kaban iaid lyngba ka lynti kaba jrong ban ioh ia ka lisen ne ka jingbit jong ki par maw. Ia kane ka Committee la bthah ba kan pynsuk ia ki kam ki jam, ban pynthikna ba ki nongtih maw ne shyiap kiba rit kin nsgewthuh kumno ban aplai ia ka Mining Lease ne Quarry Permit.”

Ka Subcommittee, kaba kynthup ia ki nongmihkhmat na ki tnad bapher bapher, kan sa shong jingialang biang ha u bnai Nohprah. Kin pynleit jingmut ha kaban pynwandur ia ka rukom treikam bad ka rukom aplai ban pynthikna ba ki nongtih maw ne shyiap kiba rit kin ioh jingshai haba ki aplai.