Shillong, Risaw 11: Ka Congress hynne ka sngi Saitjain kala pynlong ia ka jingiakhih da kaba thang ia ki dongmusa (ki sharak tynrai) ban pynpaw ia ka jingbitar halor ka jingshah pyniap dang shen jong ki arngut ki heprit ha ka jylla.
La lap ia ka met jong u heprit ba dang 7 snem ka rta bad kawei ka khynnah kynthei ba dang 13 snem ka rta hapoh ki jingjia ba sngewsih, kaba la pynmih ia ka jingsngewkhia kaba jur halor ka suk ka sain ha ka jylla Meghalaya.
La lap ia ka met iap u heprit na Mawpat ha ka 9 tarik Risaw hadien ba u la jah rngai na ka jaka sah jong u kaba don ha Nongrah. Katba iaka met ka khynnah kynthei ba suba shah batbor bad shah pyniap ha uwei u rangbah ba dang 22 snem ka rta ha Ri Bhoi district.
Ka jingiakhih jong ka Congress ka la pynpaw ia ka jingbym sngewhun jong ki paidbah kaba nang jur ia ka jingleh jong ka Sorkar ia kine ki kam runar kiba shyrkhei.
Haba kren sha ki lad pathai khubor, u secretary ka Meghalaya Pradesh Congress Committee (MPCC) u Manuel Badwar u la kynthah ia ki rukom treikam jong ka sorkar namar ba kam shym la lah ban weng ia ki daw tynrai jong ki jingeh ha ka imlang sahlang.
“(Namar kata) ka donkam ia ki polisi ban pynkhlain ia ki jinglong jong ka iing ka sem bad ban kyntiew ia ka jingiatylli ha ka imlang sahlang,” u la ong.
U Bah Manuel u la pynpaw ia ka jingsngewsih halor ka jingkynthoh jong u Symbud Myntri Rangbah ka Jylla ba khmih iaka tnat kampohiing (Police) u Bah Prestone Tynsong halor ki kam runar ba dang shen, da kaba ong ba “ka duna ka jingsngewthuh ia ki jingeh ba ki paidbah ki iakynduh”.
Ula kyntu ia ka sorkar ban shim ia ka rukom treikam kaba pura, kaba kynthup ia ki tnat bapher bapher ban thaw ia ki polisi kiba weng ia ki daw tynrai jong kine ki jingeh.
U nongialam ka MPCC u la pynrem ia ka jingbym lah jong ka sorkar ban ai ka jingiada bad jingkyrshan kaba biang ia ki longiing khamtam ia kito kiba im ha ki jingeh ha ka ioh ka kot.
Ula banjur ba uwei pa uwei u khynnah u don ka hok ban im, ban ialehkai, bad ban roi ha ka jaka kaba shngain, bad ka dei ka kamram jong ka sorkar ban pynthikna ia kane.
U Bah Manuel ula banjur ia ka polisi kaba bniah ban weng ia ki jingeh ha ka imlang sahlang bad ka ioh ka kot kiba ktah ia ki longiing bad ki khynnah, bad ban kyntiew ia ka jingsngew shimet bad ka jingkitkhlieh hapdeng ki nongshong shnong.
U la kyntu ia ka sorkar ban iatreilang bad ki nongshim bynta bapher bapher, kynthup ia ki nongshong shnong, ki skul, bad ki Balang, ban thaw ia ka rukom treikam kaba pura ban weng ia kine ki jingeh.
Na ka liang ka president jong ka Meghalaya Pradesh Mahila Congress (MPMC) ka Kong Joplyn Scot Shylla, kala ban jur iaka jingdonkam ki lad ki lynti kiba kham tyngeh ban weng ïa ki daw tynrai jong kum kine ki kam runar da kaba khang ïa ki Website ba pyni film Dakaid, bad ban pynbeit ïa ki jingthoh online kiba lah ban ïoh da ki khynnah, da kaba kdew ba ka lah ban ktah ïa ka jingmut jingpyrkhat bad ka jinglong jingman jong ki.
U Kong Joplyn kala ban jur ruh ia ka jingdonkam ban pynrung ia ka jinghikai shaphang ka jingshongkha shongman ha ki skul bad ban kyntiew ia ka jingiakren kaba laitluid hapdeng ki kmie ki kpa bad ki khynnah ban iada na kum kine ki jingjia.
Ka nongialam jong ka Mahila Congress kala buh jingkylli ia ka jingbuh hakhmat eh ia ka jingshngain, da kaba kdew ba katba ki don ki riew shimet kiba ioh ia ka leit ka wan kaba shngain bad ka jingiada, bun kiwei pat ki shah pynbor ban iaid ha ki jaka paidbah khlem ka jingpahara kaba biang.
Kala kyntu ia ka sorkar ban buh ia ki CCTV ha ki jaka paidbah bad ban buh ia ki pulit da kaba thikna ban iada na ki kam sniew.
 ban pynpaw ia ka jingbitar halor ka jingshah pyniap dang shen jong ki arngut ki heprit ha ka jylla.){kind=link}