Shillong, Naiwieng 26 : Ki kynhun Sengbhalang ba iakhih ia ka ‘Save Hynniewtrep Mission’ kila thang ia ki tyngshop jong u Myntri Myntri Rangbah ka Jylla Conrad K Sangma, Myntri Rangbah ka Assam Himata Biswa Sarma, Myntri kam Pohiing ka Ri Amit Shah bad Myntri kam pohiing ka Jylla ma Lahkmen Rymbui hajan ka Chief Minister bungalow, Shillong hynne ka sngi saitjain ha Polo.
Kine ki Sengbhalang ki kynthup ia ka Hynniewtrep Youth Council (HYC), East Jaintia National Council (EJNC), Jaintia Students Movement (JSM), Hynniewtrep Achik National Movement (HANM) bad ka Confederation of Ri Bhoi People (CoRP).
Kine ki Sengbhalang haba nyngkong kila thmu ban thang ia kine ki tyngshop ha khyrdop jong ka CM Bungalow hynrei la khang ia ki da ki Pulit ka Jylla. Hadien ka jingiatai nia kaba jur bad ki Pulit, ki Sengbhalang kila leit thang noh ia kine ki tyngshop marjan bad kane ka jaka.
Kane ka jingthang tyngshop ka long kum ka dak ban pynrem ia ka Sorkar Meghalaya bad Assam bad ruh ka Sorkar Pdeng halor ka jingbym lah ban khanglad ia ka jingjia ba 22 tarik Naiwieng ha Mukroh, ha kaba 6 ngut ki briew kila duh noh ia ki mynsiem.
Haba iakren bad ki nongthoh khubor, u Nongialam ka HANM Bah Lamphrang Kharbani ula pynrem ia ka jingthombor jong ki Pulit Assam ha Mukroh bad dawa ia ka Sorkar Jylla ban dawa ia ka Sorkar Pdeng ban phiah noh ia ka Police Cadre n aka Assam kumba long kiwei pat ki Jylla kum ka Mizoram, Nagaland bad Manipur.
U Nongialam ka HYC bah Robertjune Kharjahrin ula dawa ba ka Sorkar Jylla ka dei ban pynkhlain ia ka jingdon jong ki Pulit ha ki jaka khappud na ka bynta ka jingshngain jong ki paidbah ka Jylla haba pkynriah ba ka jingjia Mukroh kam dei satia kaba dang jia nyngkong kaba jia ha khappud ka Assam-Meghalaya.
Ula pynkynmaw ba u snem 2010, kum kane ka jingjia kala jia ha Langpih ha kaba 4 ngut ki briew kila iap bad bun ngut kila mynsaw. Une u Nongialam ka HYC ula ong ba ka Sorkar Jylla ka dei ban pynkloi noh ia ka jingiakren khappud jong ka wat kaba ar khnang ban pynkut noh ia ki jingjia kumba jia ha Langpih bad Mukroh.
Katba kane ka jingiathang tyngshop ka dang iaid shakhmat, artylli ki kali pulit kiba la pynher sted bha kila jan tynrah ia ki nongiakhih kaba la pynmih ia ka jingiatai nia kaba jur bha hapdeng jong ki hynrei ki Nongialam Sengbhalang kila lah ban pynjai jai noh ia ki dkhot da kaba ong ba kine ki Pulit ki don jingtip ba ki don ki nongiakhih ha kane jaka.
