Shillong, Naiwieng 10: Ki pulit ka jylla Meghalaya ha ka Sngi Palei, kila pynduh noh ia ki jingdih kiba sniew bad ia u Drugs kiba shongdor T.4 Klur da kaba thang noh ia ki ha ka Incenerator jong ka karkhana pynmih dewbilat ka Star Cement kaba don ha Lumshnong, East Jaintia Hills District da kaba bud ryntih ia ki jingbthah jong ka Supreme Court.
Ia kitei ki jingdih pynbuaid khamtam u Drugs kidei kiba la ioh kurup na kylleng ki jaka jong ka jylla Meghalaya bad kumta la thang noh ia ki ha ka Incenerator jong ka Star Cement.
Haba iakren bad ki nongthoh khubor, u Director General of Police u Dr. L.R. Bishnoi, ula ong ba ia kine ki jingdih kiba sniew bad ki Drugs kidei kiba la ioh kurup na ki 51 tylli ki jingjia kiba kynthup ia ki 25 tylli ki jingjia ha West Jaintia Hills, 10 tylli ki jingjia ha East Khasi Hills, 14 tylli ki jingjia ha West Khasi Hills bad 2 tylli ki jingjia ha Ri Bhoi District.
Kitei ki jingdih pynbuaid kiba la ioh kurup ki kynthup ia u Drugs uba shongdor T.3 Klur, u Ganja uba shongdor T.80 Lak bad ka dawai jyrhoh kaba shongdor T.20 Lak bad ia kine la ioh kurup na ki District kiba hap hapoh jongka Eastern Range, kaba kynthup ia ka East Khasi Hills, Ri Bhoi District, West Khasi Hills, bad West Jaintia Hills.
U Dr. L.R. Bishnoi ula iathuh ba kila don haduh 500 ngut ki nongdie drugs kiba la shah kem ha ka jingkhynra ki pulit ha kylleng ki jaka bad ula pynpaw ruh iaka jingsngewkhia halor ka jingbun ki riewshimet kiba donkti ha kaban pyndonkam ia u drugs bad kumjuh ka jingmih bun ngut ki kynthei kiba dih drugs ha ka jylla.
Ula iathuh ba ka jingpynduh ia kine ki jingdih pynbuaid kadei kaba la iaid katkum ka jingbthah jong ka Supreme Court bad la pan jingbit ruh naka Meghalaya State Pollution Control Board na ka bynta ban pynduh noh ia kine ki jingdih pynbuaid.
U Bishnoi ula ong ba ki pulit kila pynlong palat 1500 sien ia ki Awareness Program ha ki shnong ki thaw, ki jaka pule kiba don ha ka jylla bad ula ong ba ki pulit kila pyndonkam ruh ia ki 6 tylli ki buit treikam ban iakhun pyrshah ia u Drugs ha ka jylla.
Ula banjur iaka jingkongsan ban ioh iaka jingkyrshan na ki lad pathai khubor ha kaban iakhun pyrshah ia u Drugs bad ula pynpaw ruh ia ka rukom treikam ki pulit da kaba pyndonkam ia ki tiar ki tar katkum ka juk stad kaba mynta ban iakhun pyrshah ia kane ka jingeh.
U Bishnoi ula kren ruh ha kaba iadei bad ka jingtei ia ka Forensic Science Laboratory (FSL) Unit kaba paka hapoh jong ka Tnad Pulit ban pynduh noh iaka jingshaniah ha kiwei pat ki jylla ban test ia u Drugs uba la ioh kurup hapoh ka jylla Meghalaya.
U DGP ula ong ruh ba ki Pulit ki donkam ia ka jingiatreilang na ki bor pyniaid shnong bad ki nongialam niam ban iakhun pyrshah ia kane ka kam sniew hapoh ka jylla.
