Nongpoh, Lber 06 : Ka jingthang ding dusmon ia ki lum bad ki khlaw kala lam sha ka jingpluh ding kaba shyrkhei bha hynnin ka miet haka Shnong Mawlyndep, Ri-Bhoi District bad ha kane ka jingjia, kawei ka khlaw ba peit da kawei ka skul pule phadar kala shah bam duh ha ki thylliej ding.
Kat kum ka jingiathuh ki trai shnong,la suba jur ba kane ka jingpluh ding kala mih na ka jingthang lum jong ki briew ki bym lah ban ithuh, kaba la jia ha ka por janmiet. Hynrei, namar ka jingheh lyer, ki thylliej ding kila pur suki suki sha ki niut ki nier bad nang pyrsad ia ka ding katba dang iaid ka por.
Ki iathuh ba dei ha ka por janmiet, ki thylliej ding kiba la klang bha, kila poi shaka jaka khlaw jong ka skul pule Phadar bala tip kum Ka Rympei Arrupe Jesuit Novitiate, bad kala sar naphang ia ki niut ki nier bad ki dieng ba don ha kane ka khlaw.
Ki samla pule Brother bad Phadar ryngkat ki nongtrei, haba iohi ia kane ka ding ba kala pur sted sha ka jaka pule, kila iamih paidbah ban iakhun ia ki thylliej ding da kaba pyndonkam ia ki tnad dieng bam bom pynlip ia ka ding.
Ki Nongthoh khubor kiba don marjan bad kane ka jaka, haba iohi ia kane ka jingjia bad ka jingklang jong ka ding, kila pyntip mar mar sha ki Pulit ka Umiam Police Station, kiba la phah pat ia ki kali pynlip ding napoh ka Umiam Fire & Emergency Service ban akhun ia ki thylliej ding haduh ba kin da lip lut ploin.
Ki Pulit kila pynlong jingtohkit halor kane ka jingjia ban lap ia ki briew kiba donkti ban wiang ding ia ka khlaw.
Halor kane ka jingjia, u Rangbah Shnong ka Mawlyndep Bah Jino Kharbuki, u la pynrem jur ia ki briew kiba ju mlien ban thang dusmon ia ki khlaw ki btap khlem kano kano ka nongrim bad ong ba kane ka jingjia ba ing ka khlaw ki phadar ka la wanrah ia ka jingduhnong kaba khraw namar ka jinging ki dieng ki siej bad kiwei kiwei.
U la ong ruh, ba kumno ki briew ki sngewtynnad ban thang dusmon ia ki khlaw ki btap hato yn jia aiu lada don ki iing ki sem briew ha kine ki khlaw ki btap shnong. Ula iathuh ba ka Dorbar Shnong ka la dep pynmih ia ka jingmaham kaba tyngeh lada ka Dorbar Shnong ka lap ia ki briew ba thang khlaw nalor ka jingujor ejehar sha ki bor ka Ain ba kin ioh ia ka jingpynshitom kat kum ki kyndon ain.
