Shillong, Naitung 12 : U Myntri kam jngohkai pyrthei Bah Paul Lyngdoh hynne ka sngi Balang, ula pyntip ba ula iakren bad u Myntri Rangbah ka Jylla Conrad K Sangma bad Symbud Myntri Rangbah ba khmih ia ka tnad pohiing Bah Prestone Tynsong pyrshah ia ka hukum jong ka Deputy Commission ban pynjari ia ka kyndon 144 CrPC ha baroh kawei ka Nongbah Shillong.
Haba iakren bad ki nongthoh khubor, u Bah Paul ula pyntip ba u Bah Prestone un sa lum mar mar ia ka jingialang jong ki Heh Sorkar ha ka sngi Palei ban shong bishar ia ka jinglong jingman ka suk ka sain ha Shillong.
“Ngi khmih lynti ba ki kam kin sa kylla ka ban shong kat kum ka jingmih na ka jingialang lashai ka sngi” ula ong.
Ka Deputy Commissioner ka East Khasi Hills kala pynmih ia ka hukum ba pynjari ia ka kyndon 144 CrPC kaba pyrrkhing ban plie ia ki dukan, restaurant, ki enterprise ha baroh kawei ka Nongbah Shillong hadien ka por 10 baje mynmiet.
Kala khang ruh ia ka jingiadih kyaid bad leh ia ki kam bymman hapoh ki kali, pynheh jingtem hajan ki jaka pule, jaka mane blei, hospital nalor ki shnong briew hadien ka por 10 baje mynmiet.
Kane kala wan jia ruh hadien ka jingiashoh iadat hapdeng ki ar kynhun mamla ha Laitumkhrah kaba lam sah ka jingshah wiang ding ki 3 tylli ki kali ba pynieng hapoh ka phyllaw ka Laitumkhrah Police Station.
U Bah Paul ula kren ruh ia ki bor District ba ki briew ki sngew shngain haba ki dukan bad ki mall ki plie kham miet.
“Da kaba burom ia ka Ophisar, haba phi don ia ki dukan bad kiei kiei baroh ki plie mynmiet, ka jingshngain ruh ka kham bun. Phi sngew shngain haba don ki dukan ba plie marjan, haba ki mall ki plie bad ki paidbah ki lah ban iaid bad sngew shngain.Haba baroh ki khang khyrdep lut kumno phin lah ban wanrah ia ka jingsngew ba kiei kiei baroh ki biang lut” ula buh jingkylli.
U Myntri ula bynrap “Ki jingjia hangne hangtai kin don beit. Ym tang ha Shillong, kine ki jia ruh wat ha New York, ha Paris hynrei kam mut ba phin hap ban khang khyrdep lut ia baroh”.
Halor ka jingpynksan ka Deputy Commissioner ia kane ka rai da kaba ong ba ki nongshongshnong ba biang khlieh (normal) kin jin dala poi iing hapoh ka 10 baje mynmiet, u Bah Paul ula ong “Ngam lah ban tip iano fi mut ban ong ba ki biang khlieh (norman) bad mano ki bym biang khlieh namar ha ki jaka sor wat ha Guwahati, ki briew ki ju leit iabam shiteng miet, mut phin khot noh ia ki ba kim biang khlieh namar ba ki iabam por shiteng miet. Kumno phin pynshlur ia ki nongsengkam ba kin pynkylla ia ka kam jngohkai lada kiei kiei baroh ki shah khang hapoh ka por 10 baje mynmiet bad kaei kaban jia lada ki nongwan sah Hotel kip or ha ka por 10 baje mynmiet bad kim ioh bam, hato phin phah ap ia u haduh ka bam step”.
U Bah Paul uba dei ruh u Myntri ka Tnad Social Welfare, ula ong ba ha ka jingshisha kiei kiei kiba kham biang ha Shillong lada phi khmih ia ka jingkhein kem briew jong ki Pulit bad ki jingkhynra bala pynlong halor u droks.“Phin shem ba ka jingkem ia ki briew kala bun bha bad mynta ba ngi la pyntreikam ia ka PITNDPS kaba kham nep bniat, ngi khmih lynti ba kan tehlakam bha ia u droks” ula ong.
U Myntri ula pynpaw ruh ia ka jingsngew ba ki bor District kila dei ban pynkhlain ia ka jingpahara bad shah ia ki briew ba kin iaid kat kaba ki mon. “Namar ka jingsetkut ia ki hala ki jong ki Shnong kan nym weng ia kano kano ka jingeh, ha ka jingshisah ka lah ban nang pynbun pynban ia ki kam iasoh iadat hapoh kine ki Shnong”.
Pule lang ia kane: Iakhih jar jar ka MPCC ba shah mait kyrteng u Rahul Gandhi kum u MP ka Lok Sabha
