Jirang, Rymphang 17: U Kyrtong ka TMC na Jirang Constituency u Sunmoon Marak hynne ka sngi Thohdieng, ula kynthoh tyngeh iaka seng BJP ba kadei ban pynbeit shwa iaka kynrum kynram hala ka iing ka sem hashwa ba kan leit kynthoh pyrshah ia kiwei bad ula kynnoh ruh ba hapoh ka jingsynshar ka BJP iaka Assam ba ka don ka jingjur jong ki mynder ri kiba wan buhai shnong hapoh ka jylla Assam.
Katei ka jingkynthoh u Sunmoon kadei hadien ba ka kyrtong ka BJP, Riya Sangma ha ka sngi Palei kala ong, lada ka TMC ka wan ha ka bor kan don ka jingjur jong ka jingwan buhai shnong da ki briew kiba na ri Bangladesh.
“Kila shu kynnoh khlem nongrim ba ka TMC kan wanrah ia ki briew na Bangladesh hynrei kim tip pat ba ki bun bha ki briew kiba wan na Bangladesh haka jingsynshar ka sorkar BJP ha Assam” la kynnoh u Marak.
U Marak ula kynthoh jur ruh iaka aiñ ïakjakor Citizenship Amendment Act (CAA), kaba la wanrah da ka BJP kadei kaba ailad ia ki nong India ba kin thombor ia ki ritpaid na ki 6 tylli ki ri kiba don marjan.
Ula ther ruh iaka Riya Sangma kaba la kam ba dei tang ka BJP kaba lah ban pynbeit ia ka MoU jonga ka jingiapynbeit pud.
“Ki nongialam ka TMC ha Meghalaya kum u Dr. Mukul Sangma, Charles Pyngrope bad George B Lyngdoh ryngkat bad ki MP ka TMC kila iai dawa ban pynduh pyndam noha iaka MoU pynbeit pud. Ki nongialam ki jongki kila iakhun khlem shongthait pyrshah ia katei ka mat” ong u Sunmoon.
“Hynriew bnai mynshwa, kila kynthoh iaka seng jong ngi ba kam don iaka jaka jong ka jingsuhthied ha kane ka jylla.Mynta ka sngi ka jongki ka sdang bad kut da kaba kynthoh pyrshah ia ka TMC. Kila sheptieng namar ba ki paidbah ka Meghalaya ki ai jingkyrshan tang ia ka seng Meghalaya Trinamool Congress kaba lah ban leh eiei na ka bynta ka jylla Meghalaya” ong u Kyrtong ka TMC.
