Shillong, Jylliew 02 : U Symbud Myntri Rangbah ba khmih iaka Tnad District Council Affairs (DCA) Bah Prestone Tynsong, ula thalain jur ia ka rukom leh jong ka Voice of the People Party (VPP) haba pyniaid ia ka Dorbar Lyiur ba dang shu dep ha KHADC bad ong ba ka dei ka jingleh kaban “pynsniew” bad kaba hap ban pynbeit mardor.
U Bah Prestone ula iathuh ba khatwei ngut ki MDC ka KHADC kila wan ban iakynduh ia u halor kane ka kam, khamtam ka jingbuh jingkylli ia ka rukom rai ban shu phah iavote haba wanrah ia ka mang tyngka jong ka Council.
“Nga sngew ba ka dei ka rukom pyniaid ka bym pat ju jia koit haba phi wanrah ia ka mang tyngka. Ka jingkylli ban shu iavote kam mih satia. Hynrei ha kane ka sngi, ngam tip-ba bakla ne balei-u Chairman, haba wanrah ia ka mang tyngka, ula khot ia ka Iing ban shu iavote, kaba long ka kam ba bakla eh bad ka bym pat ju jia satia” ong u Bah Prestone.
Ula kyntu ia u Chairman ka Council Bah Strong Pillar Kharjana ba un leh bha iaka homework bad pynkynmaw ia ki nongia lam ka KHADC ba kin bud ia ki rules bala buh ha ka Assam-Meghalaya Autonomous District (Constitution of District Councils) Rules, 1951.
“Haba u pyniaid ia ki kam hapoh ka Dorbar, u dei ban leh kat kum ki rule, naba ki don ia ka AD Rules (Assam-Meghalaya Autonomous District (Constitution of District Councils) Rules, 1951). Ki lah ruh ban iapeit ia ki rule bad ki rukom pyniaid ia ki dorbar jong ka Assembly ne Parliament” ula ban jur.
 Bah Prestone Tynsong, ula thalain jur ia ka rukom leh jong ka Voice of the People Party (VPP) haba pyniaid ia ka Dorbar Lyiur ba dang shu dep ha KHADC bad ong ba ka dei ka jingleh kaban “pynsniew” bad kaba hap ban pynbeit mardor.){kind=link}