Thalain u Bah Paul ia ki kam ka VPP ha KHADC | Niew ba dei ka “jingibein ia ki paid nongthep vote”

Shillong, Jylliew 27: U Nongialam ka seng UDP bad Myntroi Sorkar Bah Paul Lyngdoh hynne ka sngi Thohdieng ula kynthoh tyngeh ia ka rukom treikam jong ka Voice of the People Party (VPP) ha Khasi Hills Autonomous District Council (KHADC), ia kaba u ong ba kane ka pyni ia ka jingbym pynkhreh lypa bad ka jingbym don ia ka jingshemphang ban treikam.
Haba kren shaphang ka rukom leh ka seng VPP ha kaba iadei bad ka jingpyniaid ia ka Dorbar Lyiur ha KHADC, u Bah Paul Lyngdoh ula ong, “Nyngkong nyngshap eh, ngi don ia u Nongialam ka Liang Pyrshah uba biang bha u Bah Titos Chyne, uba don ha ka kyrdan kaba biang tam ban jubab ia ki jingkylli ki jong phi. Hynrei kaei kaba nga lah ban ong, ka long ba ym don uno uno ruh uba lah ban ud ne ujor ba kim pat don ia ka jingshemphang bad ki dang pyrshang ban sngewthuh ia ka jinglong jingman. Shisien ba phi lah shah jied, phim lah shuh ban kam ba phi dang don ha ka lynti ban pule ne ioh jinghikai ne ban ioh ia ki buit ha ka ka rukom treikam. Kane ka long kaei kaei kaba ym lah ban pdiang satia”.

Ula ong shuh shuh, ba ki MDC kiba la shah jied kidei kiba la khmih lynti ba kin long kiba lah tip bha ia ki aiñ ki kanun bad ia ki aiñ kiba iada ia ka Council.

“Phi lah rung ha ka kam ia kaba la khmih lynti ba phin ialam. La khmih lynti ba phi dei ban tip ia ki kyndon aiñ, ki aiñ bad ki aiñ bapher jong ka council. Ka long kaba kongsan ba ki MDC kiba la shah jied kin pule ia ka Sixth Schedule bad ia kiwei kiwei ki kyndon aiñ bapher” ula ong.

U Bah Paul Lyngdoh ula kdew ba kila don ki jingjia ha kaba ka High Court kala buh jingkylli halor ki rai kiba la shim da ka Council la ki long kiba iaid katkum ka aiñ.
“Ka kam kaba malu mala kala poi sha ka High Court bad ka iingkashari kala shem ba ka Council kala pyntreikam ne pynmih ia ki hukum, ia kaba kam lah ban ieng kyrda hakhmat jongka aiñ. Kane ka long kaei kaei kaba pynlyngoh ia nga” ula ong.

Haba kylli la kadei ka jingkdew ka jongu shaphang ka jingpynmih hukum ka iingkashari halor ka jingwengkam ia ki nongtrei ka KHADC, ula jubab da kaba ong, “Kane kadei kawei. Ka baar kadei ka jingpynieng ia ki khyrdop Toll Gate ha ka surokbah National Highway. Shisien ba phi lah don iaka Toll Road, kumta katei ka surok kadei kaba la tei bad bei tyngka da ka NHAI, ka ialeh pat ban khyllie ia ka jingbei tyngka ka jongka da kabab uh ia ki Toll Gate. Mynta, ka bor aiu hapoh ka pyrthei kaban ailad ia kawei pat ka kynhun ban lum ia ka khajna na ka surok ia kaba kam shym la bei tyngka eiei, ia kaba ka dang hap abn pynmih ia ka pisa kaba kala bei tyngka?”

Ula ong ba ia kum kine ki mat, kam da donkam than ban da don haduh katta katta ia ka jingshemphang, hynrei ka long tang ban shu pyndonkam ia la ka jingsngewthuh kaba malu mala.

Nalor kane ula kynthoh ruh ia ki nongialam ka VPP da kaba ong, “U President ka VPP udei uba la donbynta ha kiba bun ki seng sain pyrthei hapoh ka jylla. Kumno phin kren shaphang ka jingbym pat shemphang?”

Ula pynrem jur ia ka rukom leh jong kane ka seng ha ka rukom jied ia ki nongmihkhmat.
U Bah Paul ula ong, “Phi jied ia ki briew na ki jaka bam (Dhaba) bad narud surok bad leit bret pat ia ki ha ka Council. Kane kadei ka bym long, kadei ka jingniew beiñ ia ki paid nongjied ha ka elekshon”.