Leh ka VPP kum ki Hamas, ha Pakistan bad Syria
Shillong, K’lyngkot 14 : U President ka Congress ha Jylla Bah Vincent H Pala ha ka sngi Ba-ar, ula thalain tyngeh ia ka Voice of the People Party (VPP) halor ka jingkynnoh ba ka bud ia ki dienjam ka Bharatiya Janata Party (BJP) ban pyniakhleh ia ka niam bad ka kam sain hima sima (Politics).
“Kane ka party thymmai kala pyndonkam ia ka niam ha ka jingleit ialap elekshon jong ka. Kane ka long kaba ma shibun haba phi pyniakhleh ia ka niam bad ka kam sain pyrthei. Ka Pakistan kala leh ia kane, ki Hamas kila leh ia kane bad ha Syria ruh kumjuh bad haba kut, ki briew kila pyndonkam ia ka niam ha ka kam sain pyrthei kim ju jop satia” ong u Bah Pala haba kren sha ki lad pathai khubor hadien ka jingialang ban pynithuh ia ki 18 ngut ki kyrtong sha ka elekshon MDC sha ka Iingdorbar JHADC ban long ha ka 21 tarik Rymphang.
“Lada phi leit sha ki rynsan ialap elekshon, phi sngew kumba phi leit sngap ia ki jingialap niam. Kumno kan lah long kumne?, ha Meghalaya, ngi don ia ki Khristan, ki bym dei ki Khristan kynthup ki Hindu. Kumno phi lah ba pyniakhleh ia ka niam bad ka kam sain pyrthei?” ula buh jingkylli.
U Bah Pala ula kynnoh ruh “Ka rukom leh ka iasyriem thik ia kaei kaba leh ka BJP. Ki pyndonkam ia ka niam bad ia ka bhah ban phiah ia ki briew”.
Haba ban jur ia ka jingdonkam ban kiar na ka jingpyniakhleh ia ka niam bad ka kam sain pyrthei, une u khliehduh ka Congress ha Jylla ula ong ba ki paidbah ka Jylla kila sdang ban sngewthuh ia ka buit leh politics jong kane ka party.
“Suki suki ki paidbah kila iohi ba ki kyntien ba ki kren kim iahap satia bad ka kam ba ki leh. Ki kular ban ai ia ka bhah thungkam hynrei shano kane ka bhah thungkam? Ki paidbah kim dei kiba biej” ula ong.
 halor ka jingkynnoh ba ka bud ia ki dienjam ka Bharatiya Janata Party (BJP) ban pyniakhleh ia ka niam bad ka kam sain hima sima (Politics).){kind=link}