U DGP barim u dei uba pynjot ia ka Tnad Pulit
Shillong, Rymphang 19:U kyrtong ka BJP uba long ruh u IPS ophisar barim ka jylla u Bah Mariahom Kharkrang hynnin ka sngi saitjain ula ong ba u briew uba iajan bha bad u Director General of Police (DGP) barim ka jylla mynta u don hapoh phatok namar ki kam bamsap.
“Mano ba khlieh ia ka tnad Pulit, nga hap ban buh ia kane ka jingkylli ha phi? ong u Bah Kharkrang haba kren ha ka Common Platform kaba la pynlong da ka Dorbar Shnong Wahingdoh na ka bynta ki kyrtong kiba iakhun elekshon na North Shillong constituency.
Ula kynnoh ruh ba u DGP barim udei uba la pynjot iaka tnad pulit.
U Bah Kharkrang ula pynkynmaw ba kumno ma u ryngkat bad ki para ba iatreilang kila leit iakynduh ia u Symbud Myntri Rangbah ban pynthikna ba u u ophisar uba khuid udei ban shah thung kum u DGP ka jylla.
“Ha kaba kut uba bamsap u jop. Kumta nga la sngewthuh ba ngam lah ban don lang bad nga la pan ban khmih noh ia ka tnad Prison namar ngam lah ban ailad ba u briew uba dang shu wan mynin yn pynjot pynpra iaka tnad pulit. Ngam dei u niangkohnguh. Ia nga kaba iong kan dei kaba iong bad kaba lieh kan dei hi kaba lieh” ong u Bah Kharkrang.
Ha kaba iadei bad ka jingkular ki seng sain pyrthei ban pyniohkam 3 lak ne haduh 5 lak tylli, u Bah Kharkrang ula ong, “Ka jingshisha ka long ba kim lah ban pyndap iaki kam kiba thylli haduh 7000 tylli kiba dei ki Sanction Post bad naei kin pynmih shuh shuh ia ki lad ban ai kam ai jam.”
Ula ong ka jingthungkam kontrak ia ki samla kadei ka lynti jong ka jingshim kabu ia ki samla kiba ioh da ka jingsiew kaba rit katba ki hap ban trei pura ia ka kam pat.
Une u IPS ophisar barim ula ther iaka sorkar halor ka jingpynmih iaka Tourism Policy ka bym larkam namar kumba long mynta ki briew kiba na Assam kidei kiba ioh jingmyntoi na ka kam jngohkai ha Meghalaya.
“Lada ngim lah ban kyntiew ia ka kam jngohkai ha kata ka rukom kaba lah ban ai kam ai jam ia ki samla ka jylla kumta kan ym don jingmut eiei” ula ong.
Ula kyntu ia ki paidbah ba kin vote iaka BJP.
“Kaei kaei kaba ngi leh, ngi hap ban shaniah ha ka sorkar pdeng. Lada phi vote ia ka BJP phin ym babe namar kan wanrah beit ia ki kam pynroi ha ka jylla. Hynrei lada phi kum bakla mynta ka kynti phin babe bha. Ki khun jong phi kin sa kylli na phi balei phim vote iaka BJP” ong u Bah Kharkrang.
Nalor kane, ula pynthikna ba yn pynmih iaka rukom thungkam kaba khuid ha baroh ki tnad sorkar lada u shah jied kum u MLA.
Ula ong, kumba long mynta ka rukom thungkam kaba khuid ka treikam tang ha ka tnad pulit.
Ha ka jingbym don ka policy treikam kaba khuid, ki samla kila duh jingshaniah ha ka rukom thungkam thungjam namar bunsien kin artatien ba kila don lypa kiba la ioh ia ka kam wat hashwa ban pynlong iaka eksamin, ula ong.
“Ha kaba iadei bad ka reservation policy, ngi la iohi ba 11 tylli ki post LDA kiba la pynbna ha ki lad pathai khubor, 9 tylli kidei na ka bynta ki Garo bad 4 tylli kadei na ka bynta ki Khasi. Ngam tip shuh ka jing bhah kam kaba kumno ngi iakren. Ngi la pyniap hi ialade” ong u Bah Kharkrang.
