Imphal, Jylliew 30 : : U N Biren Singh hynne ka sngi Thohdieng, ula pynshai ba un nym iehnoh satia ia ka kam kum u Myntri Rangbah ka Jylla Manipur hadien ka jingleit tur paidbah bad tawiar ki Longkmie ia ka Iingsah jong u, kiba pynpaw ba ki dang kwah ba un dang bteng ia ka jingsynshar ha Jylla.
U Biren Singh ula pynshai ba un nym pat ieh satia ia ka shuki kum u Myntri Rangbah.
“Ngan nym pat iehnoh ia ka kam kum u Myntri Rangbah” ong u N Biren Singh Myntri Rangbah ka Manipur ha ka Twitter. Kane ka jingpynthikna kala mih hadien katto katne kynta bala saphriang ki dur jong ka shithi iehnohkam u N Biren Singh, kaba la tar lyngkhot lyngkhai.
Ka khubor ba ioh ka iathuh ba ia kane ka shithi iehnohkam u Biren Singh la tar da kine ki Kynthei kiba pyrshah ia u ba un hiar shuki.
Lah iathuh ruh ba u Biren Singh u khlem ioh satia ia ka jingbthah jong ki Nongialam na Delhi ba un hiar shuki hynrei kane ka rai kala mih hadien ba u Myntri Rangbah ula sngewsih halor ka jingiakhih jong ki Kynthei kaba jia ha ka 29 tarik Jylliew ha Imphal.
Lah ban kdew ba u Biren Singh ula shah kynthoh jur bha halor ka jingbym lah ban tehlakam ia ka jingshongsuk shongsain ha Manipur hadien ba khie ka thma iapher jaidbynriew hapdeng ki Meitei bad ki Kuki, kaba la sdang naduh ak 3 tarik u Jymmang.
Da ki spah ngut ki Longkmie kila tawiar bad pakhang lynti hajan ka Iingsah u Biren Singh hynne ka step mar syn ioh jingtip ba u don jingthmu ban hiar shuki noh. Kine ki Longkmie kila pynpaw ba ki dang shaniah ha u (Biren) ban long kum u Nongialam ka Jylla bad dei kane kala pynkylla ia ka rai jong u Biren Singh.
U Biren Singh ula mih nala iing da ka jingthmu ban leit sha ka Iingsah ka Lat hynrei namar ka jingpakhang lynti ki Longkmie bad jingshah tar ka shithi iehnohkam, ula leit phai biang shala iing.
Kat kum ka khubor ba dang shu ioh, ki Dkhot jong ka BJP ha Manipur kila ia iehnohkam paidbah na ka Party bad kila pynsdang ia ka jingiakhih “War on BJP Non Violent Campaign” namar ka jingsngew ba ka BJP kala shet kylla ia ki nong Manipur.
Pule lang ia kane: Ka Manipur kala donkam ia ka jingsuk, ong u Rahul Gandhi
