Imphal, Jylliew 30: U Nongialam ka Congress Rahul Gandhi hadien ba iakynduh ia u Lat ka Jylla Anusuiya Uikey hynne ka sngi Thohdieng, ula ong ba ka “Jylla Manipur kala donkam ia ka jingsuk”.
Ula pynpaw ruh ba u thrang eh ba ka jingsuk kan wanphai ha Manipur. U pyntip ba ula leit iuhkjat ha ki katto katne ki jaka sah ba shipor bad shen ba ki don bun ki jingduna ha kine ki jaka sah bad ba ka Sorkar ka dei ban leh eiei noh halor kane.
“Nga ruh nga pang mynsiem lang bad ki paidbah ka Manipur. Ka dei ka jingjia ba ishyrkhei. Ka long kaba sngewsih bad ba pang mynsiem ia baroh ki paidbah ka Manipur bad ki paidbah ka Ri ruh kumjuh” ula ong.
“Nga la leit sha kine ki jaka sah bad iakynduh ia ki briew na ki jaidbynriew bapher bapher. Kawei ka ban ngan ong ia ka Sorkar ka long ba dei ban nang pynjanai ia ki jingdonkam ba manla ka sngi ha kine ki jaka sah. Ka bam ka dih ruh ka dei ban biang. Dei ban pynpoi ia ki dawai. Kum kine ki jingud jingnam kila mih na kine ki jaka sah” ula bynrap.
U Rahul Gandhi ula ong ruh “Nga kyrpad ia baroh ha Manipur ba ngi la donkam ia ka jingsuk. Ka jingkyrpad jong nga ia baroh ka long ba ki kam iaumsnam kan ym ai eiei iano iano ruh. Ka jingsuk ka dei ka lynti bad baroh ki dei ban iakren noh ia ka jingiasuk bad sdang ban iajam sha kane ka bynta. Nga wan hangne ban iarap kat kaba lah ha kaban wanrah pat ia ka jingsuk hapoh ka Jylla”.
“Nga ieid ia ki paidbah ka Manipur bad sa shisien, kane ka dei ka jingjia ba ishyrkhei bad ngi donkam ban wanrah jingsuk noh hangne” ula bynrap.
Shuwa kane, u Rahul Gandhi hynne ka step ula sam paidbah ia ki dur ba u leit jngoh ia ki lanot ha ki jaka sah ba shipor lyngba ki social media jong u bad ong “Ka pangmet ban iohi bad iohsngew ia ki jingeh jong kito kiba la duh noh iala ki baieid bathoin bad ki iing namar kane ka jingjia iaumsnam ha Manipur. Ka dei ka jingpyrta ia ka jingsuk na baroh ki para shynrang bad kynthei bad ki Khynnah kiba nga iakynduh”.
