Shillong, Jylliew 17 : Arngut ki Heprit kiba dei shipara bad ki dkhot ka Kynhun Rwai Niam bala tip kum ka Tarari Choir na West Khasi Hills, kila iap na ka jingshah taplup ha ka khyndew kaba twa shapoh ka Iing katba ki dang iohthiah lyngngai ha ka jingkynroi u slap hynne ka step phyrngap sngi Saitjain.
Kane ka jingjia kala jia ha ka dong Mawiong-Pyndengrei kaba hap hapoh ka shnong Pyndengrei, Nongstoin, ong ka khubor na ki Pulit kiba iathuh ba kine ki heprit ki dei ki khun jong u Bah Alexander Lyngdoh Nonglait bad ka Kong Beautiful Nongsiej.
Ki Pulit ki iathuh ba ka jingther u slap ha kine ki khyndiat sngi kala pynshong synjor ia ka khyndew ha kyrpong iing jong kane ka Longiing, kaba la twa noh hynne ka step ha ki por kumba 3:30 haduh 4 baje eiei.
Ki iathuh ba kine ki Khynnah, iwei ba dang 15 snem bad iwei ba 10 snem, ki dei kiba thiah ha madan ha ka por ba wan tyllup kane ka khyndew ia ka Iing ba ki sah.
Ki marjan marpa bad ki Pulit haba ioh jingtip ia kane ka jingjia, kila mareh wut wut ban leit ai jingiarap bad dei tad haduh ki por 5 baje haduh 5:30 mynstep ba kila lah ban sei ia ka met jong kine ki Khynnah.
Ia kine ki met la kit noh sha Civil Hospital, Nongstoin ban pyndep ia ka post mortem.
Ka khubor ba dang shu ioh ka pyntip ba ia ine I Hynmen ba 15 snem la tip kyrteng kum I Cafinia Nongsiej bad I dei iba dang shong klas X hapoh ka skul St. Peter. Katba I para ba hapoh 10 snem I kyrteng I Maya ba dang leit klas IV.
Lah iathuh ba kane ka Longiing u Bah Alexander ka dei kaba shu wan shong wai ha Pyndengrei namar ka jingwan skul jong ki Khun.
Kine baroh arngut kiba khlad ki dei ki Dkhot jong ka Kynhun Rwai Choir ba pawnam ka Thain West Khasi Hills bala tip kum ka Tarari Choir.
Ka jingrwai ba pawnam eh jong kane ka Kynhun rwai kaba la poi sha man ki thliew ing ka dei ka jingrwai gospel bala ai kyrteng ka “Mynsiem ba dang lung”.
