Dibrugarh, Jylliew 17 : Ka Dibrugarh, Assam kala don hapdeng ka jingma na ka jingshlei um bad jingshah rong ki jaka harud wah da ka jingnang kiew ka wah Brahmaputra, kaba la iaid lyngba mynta na ka kynroh bala ker ia ka jingshlei um.
Hadien ka jingther u lapbah ha kiba bun ki bynta ka Arunachal Pradesh, kiba bun ki jaka ha Dibrugarh kila shlei um bad shah taplup ha ka umsaw.
Kat kum ka khubor, ka Wah kala iaid lyngba ka kynroh bala ker ia ka jingshlei um hapoh ka thain Maijan. Namar kane ka jingkiew ka um, ki briew ha Maijan kila shongsyier bad bun kila phetwir.
Manla u snem, ka thain Maijan ka ju shah ktah jur ha ka jingshlei um ka wah Brahmaputra nalor ka jingshah rong noh ki jaka ba don ha rud ka wah.
Ha kajuh ka por, ki Heh Ophisar na ka Tnad Water Resources kila leit jngoh ia kane ka jaka ban peit thuh ia ka jinglong jingman ha ka thain.
Ha kawei pat ka khubor, ha kine ki khyndiat sngi bala leit, ka jingshah rong ki jaka puta harud wah kala jur bha ha ka thain Kolia Ghat bad Puja Ghat kaba don ha Dibrugarh.
Uwei na ki nongshonghnong ka thain ula ong ba manla u snem ka wah ka ju rong noh ia kiba bun ki jaka rep. Ha u snem bala leit noh, ka wah kala rong ia ka jaka rep ba don kumba 40 hectare eiei ha ka thain Maijan.
Kumba long mynta ka wah Brahmaputra kala kiew ia palat 105.12 meter.
Pule lang ia kane: MSL-2023 : Pynkhreh hiar madan ka Khliehmawlieh bad Rangdajied ban iaknieh nam Champion
