Shillong, Jylliew 13: Tang khyndiat por, hadien ba kila dep ban pyniap ia u Raja Raghuvanshi, ha jaka pynieng kali ka kshaid Wei Sawdong, Sohra, ka Sonam Raghuvanshi kala phet krad na Meghalaya kat kum ka jingiasylla kata ban tapdur da ka burka bad mih da ki bos ba bujli na kawei ka jylla sha kawei pat nalor ban shong da ka rel ha ka jingiaid lynti ba 2227 km ban poi sha Indore, Madhya Pradesh.
Ki Pulit mynta kila sei paidbah ia ka jingtip ba bniah kunmo ka Sonam bad kine ki briew kila phet napoh ka jylla Meghalaya, kaba pynpaw ia ka jingshalak ban pyni kum ka jingshah rahbor ban lait na ka jingshah tharai sniew bad shah bishar.
U Superintendent of Police ka East Khasi Hills u Bah Vivek Syiem ha ka sngi Palei u la batai bniah bha ba ia u Raja la pyniap ha ka 23 tarik u Jymmang hapdeng ka por 2 baje haduh 2.18 janmiet bad ia ka metiap kila bret noh sha riatbah.
Ka sonam Raghuvanshi bad ki lai ngut bak kila phet noh na kane ka jaka ba ki pyniap ia u Raja da ka Scooty ba shu wai. Ka Sonam kala niah da kawei pat ka scooty na Wei Sawdong. Katba dang don ha lynti ha shwa ban mih na Wei Sawdong kala aiti ia ka raincoat sha u Akash Rajput, uba dei u wei napdeng kiba ia donkti ban pyniap ban kah noh ia ka sopti ba la bit snam. Kine kila sangeh ruh ha Evi point ha ka thain Mawkma, ka jaka kaba u Akash u la bret noh ia ka raincoat, ia kaba la lap pat da ki pulit hadien.
“Ha ka por ba ngi lap ia ka raincoat” u Bah Vivek ula ong “ Ngim pat tikna la kadei ba bit snam ne da kiwei pat hynrei mynta la pyntikna ba kadei ba bit snam bad mynta ngi la phah sha forensics”.
Na Evi Point, u Akash u la shimti noh ia ka scooty, bad ka Sonam kala leit shonglang noh bad u, Katba u Anand Kurmi u la niah da ka scooty ba la shim wai da u Raja bad ka Sonam bad la ieh noh ha Sohra Rim. Ha shwa ban poi ha Lad Mawphlang, ka Sonam kala kiew noh da ka taxi haduh ban da poi ha Police Bazaar ha Shillong.
Na Shillong, Sonam kala kiew da ka kali tourist ban leit sha Guwahati. Na Guwahati Inter State Bus Terminus, kala kiew pat da ka bus ban leit sha Siliguri bad na Siliguri, kala kiew pat sa da kawei ka bus ban leit sha Patna, bad hadien na Patna sha Arrah, bad ha kaba khatduh kala shong da ka rel ban poi sha Lucknow. Na Lucknow kala shong biang da ka bus ban poi sha Indore bad kala poi ha Indore ha ka 26 tarik u bnai Jymmang bad naduh ka 26 tarik haduh ka 8 tarik u Jylliew kala rieh ha Indore.
Katba ka dang rieh ha Indore, u Raj u la bthah ia ka Sonam ba kan leit biang sha Siliguri ha ka 8 tarik u Jylliew da ka jingthmu ban pynmih paw bang ha Siliguri bad ban ak ne kam ba kala shah ka rahbor.
“Kine ki briew kila kyrmen ba un ym don mano mano ban lap ia ka met namar ba kadei ka jaka ba la jngai bad ma ka kan leh ak kum ka lanot” ong u SP bad bynrap ruh “Bad lehse ka lah ban pyrkhat ba ka jingtohkit kan shim por kumba shi bnai ne ar bnai namar ka met kala pyut lut bad ki pulit ruh kin ym lah ban ithuh shuh bad kumta ka ak ia lade kum ka nongshah lehbein ne kum ka lanot”.
Hynrei ha ka 6 tarik u bnai Jylliew u wei u tourist guide ia uba la tip kyrteng kum u Albert Pde uba dei na Mawlakhiat, Sohra u la iathuh sha ki lad pathai khubor ba u la iohi ia ka Sonam bad Raja ha ryngkat bad ngut ki briew ha ka 23 tarik u Jymmang, kaba dei ruh ka sngi ba shah pyniap u Raja. Kane ka khubor kala poi sha ki shkor u Raj bad da ka jingsheptieng ioh ki tip noh ia ki, u la ong ia ka Sonam ban mih noh na Indore ban leit biang sha Siliguri ban leh mynleh kum ka nong shah rahbor.
Ki Pulit ka Meghalaya kiba la iohksai lut ia kine kiei kiei baroh, kila phah ar tylli ki khynhun sha ka jylla Madhya Pradesh bad ha Uttar Pradesh ban buddien ia kine ki briew ba donkti.
Ha ka 8 tarik u bnai Jylliew, kaba dei ruh ka sngi ba ka Sonam ka pynkhreh ban leit sha Siliguri, ki pulit ka jylla Meghalaya kila ioh ban kem nyngkong ia u Akash Rajput na Uttar Pradesh bad u Raj Kushwaha u la ioh jingtip halor kane hynrei um shym la tip shai ba kidei ki pulit ne mano, hynrei da ka jingtieng ne klumar jingmut u la phone ia ka Sonam bad la iathuh ba kala dep mih na Indore ban leit sha Siliguri da ka kali ban la pynbit pynbiang u Raj, bad uba la bthah ia ka mih pyrthei noh ha kano kano ka jaka ba ka don bad pyntip sha kiba haiing ba ka dang shu lait phet na kti ki nongrahbor.
Ia ka Sonam Raghuvanshi la ioh ban kem noh na Ghazipur jong ka jylla Uttar Pradesh, kaba jngai kumba 1100 kilometers na ka jaka ba shah pyniap u Raj hadien 17 sngi.
