Shillong, Jymmang 27 : U Superintendent of Police ka West Garo Hills Abraham T Sangma ha ka sngi Balang ula iathuh ba tang kawei ka case la register pyrshah ia u MLA barim ka Phulbari SG Esmatur Mominin halor ka jingjia ba 9 tarik Lber ha Chibinang bad ia ka ejahar u MDC ka BJP na Tura Bernard N Marak la shim kum ka ujor bynrap ia ka case bala don lypa.
Ha ka kyrwoh, u Abraham ula ong ba ka jingpynshai ka long kaba donkam “khnang ban kiar na kino kino ki jingsngewthuh bakla ne kulmar jingmut halor ka jingregister ia bun tylli ki ejahar haba iadei bad kajuh ka jingjia bad ban pyntip ruh ia kane sha ki paidbah ha ka rukom kaba dei”.
Kat kum ka jingong u SP, ka joint FIR la mudui ha ka 18 tarik Lber, 2026 da ki Nongialam ka GSU Chibinang bad Phulbari Regional Unit. “Ha ka 18 tarik Lber 2026, ka joint FIR la mudui da u Joint Secretary ka GSU Chibinang, Regional Unit bad General Secretary ka GSU Phulbari, Regional Unit, West Garo Hills pyrshah ia u SG Esmatur Mominin, MLA barim ka Phulbari Constituency, ba iadei bad ka jingkynnoh kam bymman kaba jia ha Chibiang ha ka 9 tarik Lber, 2026” ong u Abraham.
Ka ejahar ka kynthup ia ka jingkynnoh ba iadei bad ka jingpynpra ia ka Ophis ka GSU bad u mot ha Iew Chibinang, ula ong.
Halor kane ka ejahar, ki Pulit ka Phulbari kila register ia ka case No. 12/2026 hapoh ka kyndon 189(2)/191(1)/192/196(C)/57/353(2)/298/324(4)(5) jong ka BNS, 2023, pule lang bad ka kyndon 6/6A/8/8A jong ka Meghalaya Maintenance of Public Order Act, ong u SP.
“Halor kane, la kem ia u nongshah kynnoh bad ka jingtohkit ia kane ka kam ka dang iaid shakhmat” ula ong.
Halor ka ejahar jong u MDC Bernard N Marak, u Abramham ula ong “Ha ka 14 tarik Iaiong, 2026, ka shithi ujor ba iadei bad kane kajuh ka jingjia la ioh pdiang ha kane ka Ophis na u Bernard N Marak, MDC, Tura. Ha ka 16 tarik Iaiong, 2026, ia kane ka shithi ujor la phah sha u Officer In-charge ka Phulbari Police Station ba un leh ia kaba donkam”.
Ula batai ba ym shym la register ia ka ejahar la ka jong. “Naba baroh ki ejahar bad ka ujor ki iadei bad kajuh ka jingjia bad ki jingshiha, ia kane ka shithi ujor bala aiti da u Bernard N Marak la shim kum ka ujor bynrap haba iadei bad ka case bala dep register lypa ha Phulbari Police Station”.
Haba sot ia ka Iingkashari Supreme Court, u SP ula bynrap “ Kat kum ki kyndon ain bala buh da ka Iingkashari Supreme Court ha ka TT Antony vs State of Kerela & Others (2001) 6 SCC 181, bun tylli ki ejahar bad bun tylli ki kam bymman ym lah ban register la ka jong haba iadei bad kajuh ka jingjia”.
U Abraham ula pynthikna ba baroh ki jingtohkit haba iadei bad kane ka jingjia la leh hapoh ka case bala register kat kum ki kyndon ka ain bad ki lynti bala buh da ka ain.
