Nongstoiñ, Jylliew 25: Ki paidbah nongshong shnong jong ka thaiñ Umkyllaiñ kaba don harum ka sor Nongstoiñ, ha ka sngi saitjaiñ ki la lap ïa kawei ka metïap kaba per ha ka jaka pyllang um lane check dam kaba don ha ka wah Umkyllaiñ, kaba hap hapoh ka shnong Urkali West Khasi Hills.
Na ka liang ki paidbah mar mar ki la pyntip ïa kane ka jingjia sha ki nongïalam shnong, kiba hadien pat ki la pyntip sha ki pulit ban wan shimti bad pyndep ïa ki jingdonkam katkum ka aiñ.
Ki Pulit ki ïathuh ba hadien ba la peit bniah ïa kane ka metïap, la lap ba ka dei jong uwei u rangbah ba la phet na Civil Hospital Nongstoiñ, ïa u ba la tip kyrteng kum u Starsis Langrin ba 34 snem ka karta, uba dei na ka shnong Shallang Sohbar.
Kum ban shu pynkynmaw ba ha ka 21 tarik une u bnai ha ka por kumba 9:30 mynmiet, u ne u rangbah u la phet na Civil Hospital Nongstoiñ hadien ba kiba haïing hasem ki la wan buh ïa u ban phah sumar.
Pule lang ia kane: Pynbna ka KSU ban iakhun da ka thma pyrshah ia u Droks ha Jylla
