Nongpoh, Nohprah 29 : Ki Pulit ka Umsning Police Station, hynne ka step sngi U Blei, kila leit ban tam ia ka metiap jong u samla ba jah na ka thain Umsning, kaba la per ha ka wah Umran kaba don ha ka shnong Sohliya, Ri-Bhoi District.
Une u Samla ba jah u kyrteng u Pynshailang Malieh ba la 18 snem tam. Une u samla u dei na ka shnong Nongjri bad ula jah naduh ka 21 tarik Nohprah.
Ia kane ka metiap la lap nyngkong da ki katto katne ngut ki khynnah kiba dang thmu ban leit jngi ha katei ka wah ha ka thain Sohliya.
Kat kum ka jingiathuh ki Pulit, une u samla u dei uba don ka jingduna ha ka bor pyrkhat.
La iohi khatduh ia u ha kawei ka Iing iap briew kaba don ha ka shnong Nongkya bad naduh katei ka miet, ula jah bad khlem wan phai iing shuh.
Ki Khynnah kiba lap ia kane ka met, kila leit ban pyntip mar mar sha ki riew rangbah jong ka Shnong, kiba la pyntip pat sha ki Pulit ka Umsning Police Station ba kin leh ia kaba donkam.
Ia kane ka metiap la pynkit noh sha Civil Hospital, Nongpoh ban pyndep ia ka post mortem. Ka jingtohkit ia kane ka jingjia kala iaid shakhmat.
