Shillong, Jylliew 04 : U Superintendent of Police ka East Khasi Hills Bah Vivek Syiem, ha ka sngi Balang, ula pynthikna ba ka kynhun ba iawad briew ha Sohra, kala ioh tam ia kawei ka raincoat (jainjri) ba don dak bit jaboh hynrei ka dang kloi palat ban pynthikna la ka don jingiadei ne em bad ka Sonam Raghuvanshi, kaba dang jah rngai.
“Ngi la ioh tam ia ka raincoat kaba jlieh. Ki don ki dak khah jaboh ha ka, hynrei ngim pat lah pynthikna la kane ka dak ka dei ka snam ne kaei-tang hadien ka jingleh test ka Forensic yn sa lah ban pynthikna ia ka” ong u Bah Vivek.
Ula ong ruh ba ki dang tohkit la kane ka raincoat ka iasyriem ne em ia ka raincoat ba phong ka Sonam na ki video bala ioh. “Ngin sa ianujor ia ki video ba ngi don, la ka dei jong kane ka kynthei ne em bad hadien katto katne por ngin sa lah ban pynthikna. Wat ka jingheh (size) ruh ka dei 3XL” ula bynrap.
Haba iadei bad ka jingiawad, u Bah Vivek u pyntip ba ka kynhun kala khura ia ki sanium baroh ha ka thain Weisawdong ha ka sngi Balang. Hynrei, ka jingther u slap kala pynthut noh ia ka jingwad. Watla ka suinbneng ka pynthuh, ka jingia wad ka dang bteng ha ki jaka ba marjan.
“Bun ki kynhun kila iadonbynta ha ka jingiawad-palat ia ka 5-60 ngut ki briew na ka NDRF, SDRF, Fire & Emergency Services, SIT, SOT bad ki trai shnong kila iadonbynta” ula ong.
Halor ka jingpyndonkam ia ki drone, u Bah Vivek ula ong ba ka suinbneng ka dang ailad tang ha kine ki khyndiat sngi. “Ka suinbeng ka dang ailad tang ha kine ki khyndiat sngi hynrei ka sniew bha bad ka jingslap kaba pynjynjar bha ia ki nongwad watla ngi la pyndonkam ia ki drone ka NESAC” ula ong.
Ula batai ba dei lyngba ka jingiarap ki drone ba la lap ia ka metiap jong u Raja Raghuvanshi.
Halor ka jingsaphriang ki khubor hamsaia, u Bah Vivek ula ong “Shibun kiei kiei kin mih. Ngi la thaw ia ka SIT. Ngin ialum ia ki sakhi satar bad ngin wad ia ki jingshisha baroh haba iadei bad kane ka kam”.
Halor ka post mortem, u Bah Vivek ula ong “Ia ka post mortem la dep ban leh hynnin ka sngi hynrei ngin dang ban ioh ia ka kaiphod”.
