Itanagar, Jylliew 4: Ka sorkar jong ka jylla Arunachal Pradesh kala hukum ban khang khyrdep noh ia ki 386 tylli ki skul kiba nod ha kaba iadei bad ka jingrung skul ki khynnah ban pule jong une u snem ba dang iaid.
Ia kane ka jingbthah, la pynshong nongrim katkum ka jingbishar bniah ia ki jingkhein ba la ioh na ka Unified District Information System for Education (UDISE), kaba la pynmih da ka State Education Department.
Kane ka rai kala ktah ia jan baroh ki skul ha man la ki district kiba kynthup ia ki skul kiba don sha ki thain ba kyndong bad ha ki jaka khappud kum ha Kurung Kumey, Tawang, Anjaw, Changlang, bad ha Upper Subansiri.
Ha kane ka thup la kynthup ia ki skul kiba don ha ka kyrdan primary, upper primary, middle, bad secondary schools.
Ha West Kameng district la ioh ia ka report ba kadei kaba bun eh ha kaba iadei bad ka jingshah khang noh jong ki skul ha kaba kila don haduh 73 tylli ki skul bud pat sa ha Papum Pare kiba don haduh 50 tylli ki skul, ha West Siang 31 tylli ki skul, ha Upper Subansiri bad ha Siang ki don mar 28 tylli ki skul kiba la shah khang bad ha East Kameng ki don 23 tylli katba ha kiwei ki district ki don ki skul kiba la shah khang ki don 1 haduh 22 tylli ki skul.
“Ka jingkhang ia ki skul kiba ym shym la don kiba pynrung khynnah skul (zero enrolment) kanplie lad ban dang pynkhlain ia ka rukom trei kam jong ki skul bad jaka pule kiba donkam ia ka jingkyrshan. Kane kan ialam ban ioh ia ka jingpule kaba bha kumba la thmu da ka National Education Policy (NEP) 2020,” la ong u wei u heh ophisar.
Kane ka dei ka sien kaba ar jong ka jingkhang khyrdep noh ïa ki skul ha Arunachal Pradesh. Ha u snem 2023, ka sorkar ka la dep khang haduh 600 tylli ki skul sorkar namar ki daw kiba kum kine.
