Shillong, Lber 23 : U phria uba wan ha ryngkat u slap, ula lynshop ha kylleng ki shnong ka East Khasi Hills bad bun ki shnong kila sakhi ia ka jinglieh shaid ki madan madiah namar ka jingrben jong u phria.
Kane ka jinghap phria kala pynhiar kynsan iaka jingkhriat jong ka suinbneng hapoh kane ka thain Mihngi jong ka Jylla.
Kane ka jinghap phria kala neh kumba shi kynta tam ha kiba bun ki shnong bad don ruh ki shnong kiba la sakhi ia ka jing hap u phria kat ki marble.
Ka Shnong Mawreng, Laitpynter, Marbisu bad Kreit, East Khasi Hills kila kylla long kum kawei ka ri thah namar ka jingrben jong u phria uba la tap lut ia ki jaka.
Ka Mawlai ruh kala mad ia ka jinghap u phria uba jur bha uba la neh da ka kynta bad ki jaka kiba kham jur eh ki dei ha ka thain Mawlai Mawiong, Mawtawar, Umrynjah bad kiwei kiwei.
Ki surok bad ki jaka madan kila lieh shaid da u phria haduh ba ki kali kila hap ban iaid husiar bha namar ka jingsyntuid jong ki surok.
Kumjuh ruh ha ki thain Umroi, Bhoirymbong ruh la iathuh ba ka jinghap u phria kala jur bha bad ki madan, ki surok kila lieh shaid da u phria.
