Shillong, Jymmang 30 : Hadien ka jingpang khlam ki sniang bala tip kum ka African Swine Flu, mynta pat s aka jingpang ki Masi bala tip kum ka Lumpy Skin Disease (LSD) kala syllad hajan baroh ki District ka Ri-lum Khasi.
Kat kum ka khubor ba ioh lum, la iathuh ba haduh 20 tylli ki masi kila iap kynsan kynsan na ka jingpang ka bym lah ban tip ha ka Shnong Pynthorumkhrah, Shillong bad la suba jur ba kine ki masi kila iap na kane ka jingpang LSD.
Ka Sorkar Jylla lyngba ka Tnad Animal Husbandry & Veterinary, kala pynthikna ia ka jingsyllad ka jingpang LSD ia ki masi hapoh ka Ri-lum Khasi hadien bala pynthikna na ka jingleh test jong ka National Institute of High Security Animal Disease (NIHSAD), Bhopal.
Kat kum ka jingpyntip ka Tnad, ka NIHSAD kala phah ia ka kaiphod jingtohkit ha ka 12 tarik Jymmang 2023 hadien ba tohkit ia ki test sample bala phah na ka Jylla naduh ka 28 tarik Iaiong, 2023.
Ka Tnad kala pyntip ba ki Shnong kiba la shah ktah ha kane ka jingpang Lumpy Skin Desease (LSD) ki kynthup ia ka shnong Sumer, Mawlyngkhung, Umpyrdong-Umden, Umkon-Umdem, Saiden-Nongpoh bad Jyntu-Nongpoh kiba hap hapoh ka Umsning C&RD Block ha Ri-Bhoi lem bad ka shnong Rangthong kaba hap hapoh ka Mawkyrwat C&RD Block, South West Khasi Hills.
Kum shibynta ban tehlakam ia kane ka jingpang ban lait na ka jingsaphriang, ka Sorkar Jylla kala pynbna ia kitei ki shnong kum ki ‘Infected Village’ ne ki Shnong bala iabit jingpang LSD.
Halor ka jingjia ha Pynthorumkhrah, ka Shlem kala ioh ban iakren bad uwei u Nongri Masi uba la pyntip b aula dep khot ia ki doktor ka Veterinary halor ka jingiohpang ki masi jong u bad ki doktor kila dep ruh ban ai injek nalor ki dawai ia ki madi hynrei ki masi kila iap na kane ka jingpang.
