Shillong, Jymmang 06 : Ka jingsyllad jong ka eriong kaba wan ha ryngkat u lapbah bad u phria ha ka janmiet sngi U Blei, kala wanrah ia ka jingjulor haduh 483 tylli ki Iing bad palat 29 tylli ki Block kila shah ktah hapoh ka Jylla.
Kat kum ka jingkhein bala ai da ka State Disaster Management Authority (SDMA), artylli ki Iingskul kila shah jynrat ha Eastern West Khasi Hills bad kawei ka tnum jong ka Iingmane kala shah rong ha Wapung, East Jaintia Hills.
Ka jingdon jong ki briew kiba la shah ktah ha kane ka jingwan hap u phria, u slap bad ka eriong, kala kot sha ka 949 ngut ha baroh kawei ka Jylla.
East Khasi Hills :
Ka SDMA ka pyntip ba lai tylli ki C&RD Block kila shah ktah ha ka jinglynshop ka eriong bad u slap uba jur bad kine ki dei ka Mawryngkneng, Mawkynrew bad ka Mawphlang Block.
Ha Mawryngkneng Block, kawei ka Shnong kala shah ktah na ka eriong bad haduh 21 tylli ki Iing kila shah pynjulor.
Ha Mawkynrew Block ruh, ka dei ka eriong kaba la ktah ia kawei ka Shnong bad kawei ka Iing kala julor nalor 3 ngut ki briew kila shah ktah.
Katba ha Mawphlang Block kala mad ia u lapbah uba la pynjulor ia 3 tylli ki Iing. Ka SDMA ka dang lum jingtip ia ka jingdon ki briew kiba shah ktah ha Mawryngkneng bad Mawphlang Block.
Ia ki briew la shah ktah la pynkynriah noh sha ki iing jong ki bahaiing hasem bad la sam ruh ia ki marbam mardih sha ki.
Eastern West Khasi Hills:
Ka SDMA ka pyntip ba ka jingpynjulor ka jur eh ha Eastern West Khasi Hills na u phria bad ka eriong ha kaba haduh 14 tylli ki Shnong kila shah ktah bad haduh 69 tylli ki Iing kila shah pynulor. La iathuh ruh ba artylli ki Iingskul kila shah pynjulor ha ka eriong bad u phria.
La iathuh ba haduh 413 ngut ki briew kila shah ktah ha kane ka District bad haduh 50 hectare ki jaka rep kila shah pynjulor.
West Khasi Hills :
Ka Nongstoin Block ruh kala shah ktah jur bha ha u phria bad eriong ha kaba haduh 52 tylli ki Iing kila shah pynjulor bad haduh 250 ngut ki briew kila shah ktah.
Ha Mawshynrut Block, ka eriong kala lynshop jur ha kawei ka shnong bad ki don haduh 11 tylli ki Iing ba shah pynjulor bad 57 ngut ki briew kila shah ktah.
South West Khasi Hills :
U phria uba jur ula lynshop ha kane ka District bad ula wanrah ia ka jingjulor ha ki 6 tylli ki Shnong kiba hap hapoh ka Mawkyrwat C&RD Block. Haduh 26 tylli ki Iing kila shah pynjulor ha une u phria bad haduh 159 ngut ki briew kila shah ktah.
West Jaintia Hills :
Kane ka district kala mad ia ka jinglynshop jong ka eriong bad artylli ki Block kila shah ktah ha kane ka jingwan ka lyer bad kine ki dei ka Thadlaskein bad Amlarem Block. Ha Thadlaskein, 2 tylli ki Shnong kila shah ktah bad 4 tylli ki Iing kila shah pynjulor katba ha Amlarem pat, tang kawei ka shnong kala shah ktah bad kawei ka Iing kala shah pynjulor.
East Jaintia Hills :
Ha kane ka District, tang u lapbah ula syllad ia ka thain bad wanrah ia ki jingjulor ha ki artylli ki Block ba kynthup ia ka Wapung bad Saipung Block. Ha Wapung Block, kawei ka Shnong kala shah lynshop jur eh bad 2 tylli ki Iing lem bad kawei ka Iingmane kila shah pynjulor bad 18 ngut ki briew kila shah ktah.
Ha Saipung Block, tang kawei ka Iing kala shah pynjulor bad 7 ngut ki briew kila shah ktah. Ia ki briew ba shah ktah la pynkynriah noh sha ki iing jong ki bahaiing hasem.
South Garo Hills:
Ka jinghap phria kaba jur eh ka dei ha Baghmara Block, South Garo Hills bad ha kane ka thain, haduh 282 tylli ki Iing kila shah pynjulor hynrei ha Chokpot pat, kala syllad ka eriong haduh ba 10 tylli ki Iing kila shah pynjulor bad 42 ngut ki briew kila shah ktah.
Ka SDMA kala bthah ia baroh ki District Disaster Mangement Officer (DDMO) ban shim ia ki sienjam ha kaban leit ai jing iarap ia ki briew kiba shah ktah.
