Nongstoiñ, Risaw 25: Ka ‘eriong Sitrang ryngkat u ‘lapbah kaba la neh mynta la ar sngi kynthih, ka la syllad naphang ïa u kba bad ki jingthung jingtep ha kiba bun ki shnong kiba don ha West Khasi Hills, kat haduh ba ka jingjulor ka la ktah jur ïa ki nongrep kiba la ap khmih lynti satang ia ka aiom ot.
Ym tang ki jingthung jingtep, hynrei la ïoh khubor ruh ba ki la don kumba hynriew tylli ki ïing kiba don ha ki thaiñ nongkyndong kiba la shah ktah na ka jingjur ka lyer. Kine ki kynthup naduh ka ïing u bah Kyrshanbor Langrin, Ramsing Syiemlieh, Merry Thongni, Deicy Nongsiej bad Theoris Nongsiej.
Kine ki ïing ki dei ka ïing kaba don ha ka shnong Nongkyna Mawshynrut Civil Sub Division, ha kaba ka lyer ba jur ryngkat u slap bah, ka la ïoh ban jynrat ïa ki katto katne ki bynta jong kitei ki ïing, tangba ym shym la don ba mynsaw.
La ïoh khubor ba ki don kiwei de ki ïing ha ka thaiñ kiba la julor nalor ki jingthung jingtep hynrei haduh ba thoh ïa kane ka khubor ym pat lah satia ban pynthikna ïa ka jingjulor bad katno ki shnong ba la shah ktah na kane ka ‘eriong.
Na ka liang u Secretary ka Hills Farmers Union West Khasi Hills District u Bah Lumlang Kharsyiemlieh, haba pyntip ha u nongthoh khubor hynne ka sngi, u la ong ba ka la long shisha kaba isynei ïa ki pynthor kba, namar u slap bah bad lyer ba jur, u la syllad bad rat lut naphang ia ki jingthung baroh.
U la iathuh ba ka jingshah pynjulor ba jur eh ka dei ha ka thaiñ Umyiap bad jan baroh hi pynthor thung kba, ki la shah ktah ha kane ka jingjia. Ka HFU ka kyrpad ïa ka sorkar ba kan ïarap lem bad ban phah wan jngoh bad ban ïarap kyrkieh lyngba ka Relief Fund ia ki lanot jong kane ka eriong.
