Shillong, Naiwieng 30: Ka Meghalaya ka la pynliem ia ka Arunachal Pradesh da 6 wiket ha ka lympung ialehkai ka Syed Mushtaq Ali Trophy 2025-26 ba long ha Pune hynne ka sngi.
Ka Arunachal Pradesh ka la jop ia ka jingkynting pisa bad kala jied ban tied nyngkong ha kaba kala lah ban kamai 118/7 na ki 20 over. Ka Meghalaya kaba wan ban beh ia ka thong, kala lah ban kamai ia kane ka run tang da ka jinghap saw wiket bad ba dang sah sa kumba san over.
Ha lyndet kane k jingjop ka Meghalaya ka la wan hadien ba u Kishan Lyngoh uba la ioh ruh ban khur ia ka nam Player of the Match, u la lah ban kamai 57 ron na ki 42 tylli ki bol bad ba un iai neh haduh ba ka Meghalaya kan da kam sha u line ka jingjop, ha kaba u la lah ban bynrap bad ki hynriew tylli ki boundary bad artylli ki six.
Ha kaba sdang u Kishan u la ialeh katba lah tang ba un shu iai neh shwa hapdeng ka madan iakhun bad ban shu iarap ban kyrshan ia u Arpit Bhatewara uba la lah ban kamai 41 ron ba la wan na ki 28 tylli ki bol bad kine baroh arngut ki seng ia ka nongrim kamai ron paralok kaba 62 ron na bynta ka wiket ba nyngkong.
Haba phai sha ka por ba ka Arunachal Praesh ka la wan ba kan bet nyngkong, dei tang u Techi Neri uba la lah ban kamai 32 ron ba la wan na ki 42 tylli bol, hynrei kiba sah na ki batsman ki jong ka, kim shim la lah than eh ban lam khmat ia la ka jong ka kynhun, katno tam lei lei haba ki nongkawang bol ka Meghalaya na ka por sha ka por ki iai bteng ban khur ia la ki wiket ki jong ki, kaba hangne la shem bad iohi ba ka nongrim kamai ron paralok kaba heh naka bynta ka Arunachal ka long 36 ron naka bynta ka wiket kaba lai.
Ki namtam napdeng ki nongkawang bol ka Meghalaya u dei u Swarajeet Das uba la ioh ban khur 2/19 na ki 3 overs, bud pat sa u Agreas Chamcham Sangma took 2/24 na ki 4 over, bad bynrap lang da u Aaron Nongrum 1/15 na ki 4 over bad Akash Choudhary 1/21 na ki 4 over.
Da kane ka jingjop, ka Meghalaya ka don mynta ka kyrdan kaba ar ka miej iakhein point jong kane ka group hadien ba ka la ioh ban khur 8 point.
Kumban shu pynpaw hangne ba ha ka jingiakhun kaba la long ha ka sngi Thohdieng ka Meghalaya ka la shah liem noh hakhmat ka Manipur da 25 ron.
Ka jingiakhun kaban wan ia ka Meghalaya kan dei ha ka sngi Hatmajai jong ka taiew pyrshah ia ka Nagaland.
