Shillong, Jylliew 03 : Ka Jylla kala pynbiang lut nadong hadong ha kaban pynlong ia ka jingview ia ki vote jong ka Elekshon Lok Sabha na Shillong bad Tura constituency bad ki bor District kila buh bun syrtap ki bor pahara ha baroh ki 12 tylli ki jaka niew vote ha Jylla.
Kin don haduh 8 tylli ki jaka niew vote jong ka Shillong parliamentary constituency bad 5 tylli jong ka Tura parliamentary constituency.
Ka Election Commission of India (ECI) kala phah ia 18 ngut ki nongpeit pyrman ia ka jingniew vote hapoh ka Jylla.
Hadien ba dep jurip ia ka jaka niew vote ha JN Stadium, Polo shisngi shuwa ka jingniew vote, u Chief Secretary ka Jylla Bah D.P.Wahlang ula ong ba u sngewhun ban iohi ia ka jingpynkhreh ha baroh ki jaka niew vote.
“Hadien ba khmih ia baroh ki sienjam bala shim da u Returning Officer, nga thikna ba ka jingniew vote kan long kaba iaid beit bha lashai ka sngi ka ban sdang naduh ka por 8 baje mynstep” ula ong haba iakren bad ki nongthoh khubor.
“Ki bor pahara kila khlain bha. Nga dang shu iakren bad u SP jong ka District, uba la pyntip ba ula buh bun bha ia ki bor pahara hangne…kumta ngi la hun ia ka jingpynkhreh” ong u Chief Secretary.
U Chief Elecctoral Officer (CEO) BDR Tiwari ula pyntip ba baroh ki jingpynkhreh ha ka liang ki bor pahara kila biang lut mynta. “Ngi la don bun ki Pulit ha man ki jaka niew vote ban khmih ia ka suk ka sain” ula ong.
“Ka jingniew vote kan sdang ha ka por 8 baje mynstep. Ka jingniew ia ki EVM ha Shillong bad Tura kan sdang naduh ka por 8:30 baje mynstep bad ha kiwei ki jaka kan long ha ka por 8 baje mynstep” ula bynrap.
Haduh 10 ngut ki kyrtong na Jylla kila iakhun ia kane ka elekshon Lok Sabha ba kynthup ia 6 ngut na Shillong parliamentary constituency bad 4 ngut na Tura parliamentary constituency.
