Shillong, Nailur 11: Ka kynhun ïalehkai phutbol Under-17 Boys’ jong ka Meghalaya kala shah pynliem noh ha ka Manipur ha ka Tie Breaker hadien ba kila iakhaid da 1-1 ha ka phainal jong ka Subroto Cup International Football Tournament kaba 63 kaba la long hynne ka sngi Banaglang ha New Delhi.
Ka Manipur ka la jop ia kane ka Cup hadien 43 snem.
Ka T.G English School, kala mihkhmat ia ka jylla Manipur, kala lah ban thep ia ka kol ha ka minit kaba 32 jong ka kylla step lyngba u Namdiong, katba u Banpliebok Khongjoh jong ka Mynken Christian Higher Secondary School, Ri Bhoi ula ioh thep ia ka kol ha ka minit kaba 64 jongka kylla miet ban pyniakhaid ia kane ka jingiakhun.
Watla ka Meghalaya kala iakhun bha kam shym la lah ban thep kol bad ki nongialehkai shadien jongka Manipur ruh kila lah ban ialehkai bha ban iada ba ka Meghalaya kan ym ioh thep kol watla kala ioh bunsien ia ki kabu ban thep kol.
Ka Meghalaya kala ialehkai bha naduh kaba sdang ka jingiakhun da ka jinglah ban ialehkai bha u Banpliebok, uba la ioh ia ka khusnam ‘Player of the Tournament”, bad Banganson Nonglhlang uba la ioh thep 3 tylli ki hat-trick ha katei ka lympung ialehkai football.
Ka Meghalaya kala ioh iaka Penlaty ha ka minit kaba 16, haba u Heroba jongka Manipur ula ktah da ka kti ia ka bol kaba dei ban leit rung shapoh kol, hynrei haba u Alicester Thangkiew ula leit ban shut ia ka penalty ym shim la lah ban thep ia ka kol.
Tang hadien katto katne minit, u Masharing ula ioh ia ka kabu ban pyniakhiad hynrei ym shim la lah ban thep ia ka kol kaba la shut da u Banpliebok.
Ki Coach jong kitei ki ar tylli ki kynhun kila bujli ia ki nongialehkai bad sa tang 10 minit jong ka jingiakhun, la pynmih ia u Shylla uba la shut ia ka bol bad kala leit dei ia ka kti jong u Nestanboy bad kala pynlong ia ka Meghalaya ban ioh ia ka penalty ka baar bad ha kane ka por u Banpliebok, uba dei u nongialehkai uba kongsan ula leit ban shut bad khlem kano kano ka jingartatien ula thep ia ka kol.
Haba kine baroh ar tylli ki kynhun kila iakhaid da 1-1 ha ka jingiakhun kumta ban rai mano ban rah ia ka nam lahduh la pynlong noh da ka Tie Breaker.
U Alex bad u Namdiong kila thep ia ka kol na ka bynta ka Manipur, katba u Richborn bad u Pynshailang kim shym la lah ban thep, hynrei hadien kane u Yohenba bad u Manimatum kila lait ban thep ia ka kol ha ka tie breaker hynrei u Banpliebok bad u Masharing kila ioh ban pyniakhaid da kaba thep ia ka kol.
Hadien kane u Goutam bad u Bipiush kiba la leit shut na ka bynta ka Manipur bad Manipur bad kila ioh thep ia ka kol bad hadien kane u Phonis ula ioh ban thep ia ka kol na ka bynta ka Manipur katba u Wanpli ula shut sharud bad ym shim la lah ban pynrung ia ka bol shapoh kol.
Ka Manipur kala ialehaki tang 10 ngut ki nongialehkai la jan 20 minit ha ka kylla miet bad watla ka Meghalaya kala mad ia ka jingrem hynrei kala ialehkai bha ha katei ka lympung iakob ialehkai football.
Ka Mynken Christian Higher Secondary School kala pynrem ia ka Daman and Duia da 23-0, kala pynrem da 5-0 ia ka Bihar, kala pynrem da 3-1 ia ka CISCE ha ka Quarterfinal, kala pynrem ruh da 7-0 ia ka Arunachal Pradesh ha ka Semi Final.
Ka kynhun kaba la jop kala iohpdiang T.5,00,000 katba ka kynhun kaba la wan baar kala ioh T.3,00,000, katba ki kynhun kiba la rem ha ka Semi Final kila ioh mar T.75,000, katba ki kynhun kiba la leim noh ha ka Quarter Final kila ioh mar T. 40,000.
KHUSNAM SHIMET
Best Player (T.40,000):Banpliebok Khongjoh, (Myngken Christian Higher Secondary School, Meghalaya)
Best Goalkeeper (T.25,000): Master Ranidas (T.J. English School, Bishnupur, Manipur)
Best Coach (T.25,000): Kitborlang Kharlukhi, (Myngken Christian Higher Secondary School, Meghalaya)
Fair Play Award (T.50,000): Guru Gobind Singh Sports College, Lucknow, Uttar Pradesh
Best School (T.40,000): T.J. English School, Bishnupur, Manipur
