Nongpoh, Risaw10 : Sa kawei ka Khynnah bad dang 13 snem ka rta, la suba jur ba ka shah pyniap dusmon ha ki riew thrang snam ha ka sngi Palei, ha ka thain Khyndewso, Ri-Bhoi District.
Kane ka khynnah kala jah ha lynti katba ka dang wan phai na skul sha Iing, ong ki Pulit.
Kat kum ka jingiathuh u Kni jong kane ka Khynnah Bah Kowel Lyngdoh, la ong ba kane ka Khynnah ka dang wan phai na skul ha ka por 10 baje mynstep, kaba dei ka por wai skul step hynrei katba ka dang iaid lynti, kala iakynduh ia ka Kmie kaba dang mut ban leit donkam sha Iing u Rangbah Shnong.
U iathuh ba ka Kmie kala bthah noh ia kane ka Khynnah ba kan leit noh ma ka sha Iing u Rangbah Shnong katba ialade kan ioh leit donkam noh shawei.
U iathuh ba dei hadien ba kane ka khynnah ka khlem poi shuh sha Iing, kumba ha ka por 7 baje janmiet, ki bahaiing kila pyntip noh sha ki bor Shnong bad da ka jingiawad paidbah, tang hadien khyndiat por, la lap noh ia ka metiap jong kane ka khynnah na kawei ka khlaw ha ryngkat ka pla kot skul.
Ki Pulit mar syn ioh jingtip ia kane ka jingjia, kila leit hiar wut wut sha katei ka jaka ban tohkit bad ban leit ia kaba donkam kat kum ki lynti jong ka Ain.
Ia ka metiap jong kane ka khynnah la pynkit noh da ki Pulit ka Mawlasnai sha Civil Hospital Nongpoh ban pyndep ia ka post mortem.
Ia ka khubor ba kham bniah yn sa pyllait kham shibit.
