Nongpoh, Jylliew 27: Ha kawei ka jingjia kaba sngewtriem, kawei ka longkmie ka la duh noh ia la ka jingim hadien ka jingmynsaw kaba jur katba u kurim u la mynsaw jur bad la pynkit sha Civil Hospital, Shillong ban ioh jingsumar.
Katkum ka jingtip ba la iohlum na ki pulit, la iathuh, ba ki pulit ki la ioh jingtip ha ka miet jong ka 25 tarik, arngut shi kurim ki la mynsaw jur ha la ka iingsah ka jong ki kaba don ha 5 Kilo, Kyrdem Kulai Ri Bhoi District, kumta marmar ki pulit ki la leit jurip sha katei ka jaka bad ban lap ia ki ar ngut shikurim kiba la thiah hapdeng ka jinglyngkien ka snam.
Kine ki shi kurim ki kyrteng ka Bina Sunar bad u Keshab Sunar. Ki iathuh ba ki doktor kila pynbna ba kane ka Longkmie ka la khlad lypa ha katei ka jingjia.
La iathuh ruh, ba u kurim jong kane ka longkmie u la mynsaw jur bad la pynkit sha Umsning CHC ban ai jingsumar bad hadien la pynkynriah noh sha Civil Hospital Shillong bad haduh mynta u dang don hapdeng ka jingbym tip briew bad u dang don hapdeng ka jingshah sumar.
Na ka liang ki bor pulit, ki la pyntip ruh, ba ki don ka jingsuba ba kane ka jingjia ka lah ban jia tang na ka jingiakynad ne iashoh shikurim ha kaba la mih ruh ka jingpyndonkam ia ki tiar ba neb kaba la pynlong ia kine ki shikurim ban mynsaw jur bad haduh ba katei ka longkmie ka la khlad noh na kane ka jingjia.
La iathuh ruh, ba ka para jong katei ka longkmie kaba la khlad noh ka la ujor da ka ejehar halor kane ka jingjia kaba sngewtriem ha Nongpoh Police Station bad ki pulit ki la pynlong ia ka jingtohkit bad kurup ruh ia ki tiar ba nep ba la suba pyndonkam ha katei ka jingjia.
Ia ka metiap jong kane ka longkmie la aiti noh sha ki bahaiing hadien bala pyndep ia ka post mortem.
