Shillong Naitung 29: Ka Mawlai SC kala iohrah ia ka nam lahduh jong ka Shillong Sports Association’s Women’s League 2023 da kaba pynliem iaka Laitkor SC da 3-1 ha ka phainal kaba la long hynne ka sngi saitjaiñ, ha SSA Stadium, First Ground, Polo.
Ka Mawlai SC ha u snem bala dep kala rah ia ka nam lahduh ia ka Women’s League bad mynta u snem ruh, kala bteng biang ban rah ia katei ka nam lahduh da ka jingialehkai bha ki thei samla ha ka phainal hakhmat jong ki spah ngut ki nongpeitkai.
Ka Sunalinda Iawren kala thep ia ka kol ha ka minit kaba 15, ka Charlinda Nongtdu ha ka minit kaba 40 bad ka Ideibanri Kharpan kala thep kol ha ka minit kaba 50 na ka bynta ka Mawlai SC katba ka Iawanlang Nongbet kala ioh thep iaka kol ha ka minit kaba 36 naka bynta ka Laitkor SC.
Ka jingrisa bad jingkmen kala mih na ki thei ialehkai ka Mawlai haba ka jingiakhun kala poi noh sha kaba kut, katba ki thei jong ka Laitkor SC kila sngewsih kthang bad jaw ummat namar sa shisien kila shah pynliem biang haka Mawlai haka phainal jong ka Women’s League.
Watla ha kane ka jingiakhun la don kiba mad iaka jingjop bad jingrem hynrei kine ki thei samla kila ialehkai bha bad pyni iala ka sap ka phong bad kane ka pynpaw shai kdar ba ka jingialehkai football ki kynthei kala kiew bha hapoh ka jylla.
Ka Kongsan ha kane ka sngi, ka Director of Sports and Youth Affairs, ka Kong Isawanda Laloo kala aiti iaka cheque kaba T.30,000 bad ka khusnam sha ka Mawlai SC kaba la long ka lahduh, katba ka Laitkor SC kala iohpdiang iaka cheque kaba T.18,000 ryngkat bad ka khusnam.
Ha kane ka sngi la iadonlang u ki nongkitkam ka SSA kiba kynthup ia u Bah Karsing Kurbah, Bah Prosper Warjri bad Freddy Kharpran bad kiwei kiwei.
Ka Priyanka Latam jongka Lumparing SC kala ioh iaka khusnam Best Goalkeeper, Nisilia Majaw jong ka Laitkor SC kala ioh iaka khusnam Player of the Tournament bad ka Sunalinda Iawren jong ka Mawlai SC kala ioh iaka khusnam Player of the Final.
Pule ruh: Rai ka KSU ban iaid paidbah ha Nongpoh ba kuman ka MeECL ban pynbiang bording
