Shillong, Naitung 21: Ka jingiakhun semi phainal jongka Shillong Sports Association’s Women’s League 2023 kan long haka sngi Saitjain ha SSA Stadium, First Ground, Polo.
KI saw tylli ki kynhun ialehkai kiba la ioh rung sha ka semi phainal ki kynthup iaka Mawlai SC kaba dang bat ia ka nam lahduh, ka Laitkor SC kaba la wan ba-ar ha u 2022, ka Lumparing SC bad ka PFR Football Academy.
Ka lahduh ha ka Group A ka Laitkor SC kan iakhun pyrshah iaka Lumparing SC kaba la wan ba-ar ha ka Group B ha ka por 2 baje mynsngi bad hadien kane ha ka por 4 baje janmiet, ka lahduh ha ka Group B ka Mawlai SC kan iakhun pyrshah iaka PFR Academy kaba la wan Baar ha ka Group A.
Ka Mawlai bad ka Laitkor kila ialehkai bha ha ka Women’s League bad wat ka Lumparing kaba dei ka kynhun kaba kynthup bun da ki samla kynthei kam shim la shah pynliem ha baroh sa nsien ki jingiakhun.
Ha ka jingiakhun khatduh ha ka Group, ka Lumparing kala iakhaid bad ka Mawlai da 3-3 kol bad kane ka kynhun ka lah ban buh ha ka jingeh iaka Laitkor ban jop suk ha ka jingiakhun ha ka semi phainal.
Kadei tang ka Laitkor, kaba la jop ha baroh ki jingiakhun ha kane ka kynti kaba mynta bad kala shah thep tang shi kol haduh mynta kaba la thep da ka PFR.
Ka PFR kala ioh thep shi kol hynrei ka Laitkor kala beh nadien ban ioh thep syndon 3 kol ban jop iaka jingiakhun bad kane kadei ruh ka sien kaba nyngkong ba ka PFR kan mad ia ka nam rem.Ka PFR kan shem jingeh pat ha ka jingiakhun pyrshah iaka Mawlai ha ka semi phainal.
Pule ruh: Rai ka HSPDP ban phah noh shen ia ki jingai jingmut halor ka Reservation Policy
