Shillong, Naiwieng 07: Ki ar kol ba la ioh ban the pia ki lyngba u Stephanson Pale, ka pynlong ia ka lahduh jong ka lympung Shillong Premier League ka Langsning FC ba kan hah liem noh hakhmat ka Rangdajied United FC, ha ka jingiakhun ia ka semifinal, ka Super Cup, kaba la long hynne ka janmiet ha SSA Stadium, First Ground, Polo.
Ka kol ba nyngkong kaba u Stephanson u la ioh ba un thep, kadei kaba u la ioh ban shut kham jam bha ia ka bol, hajan ka kut ka kol jong ka Langsning FC kaba la ioh artad ba kan da byllud ia uwei na ki rang ba ialehkai dien ka Langsning FC, u Apborlang Kurbah, kaba la pynlong ia ka Rangdajied ba kan lah shwa ban tam shakhmat da shi kol ha ka kylla step.
Haba wan ban bteng ia ka kylla miet, ka Lasngning FC ka la pyrshang ban lah ban wanphai biang sha ka jingiakhun ryngkat ka thong ban lah ban pynphai shwa ia kane ka shi kol ba ka la dep ba kan sha tam.
Da kumta, ka kylla miet, ka long ba ka Lasngning FC, ka la pyrshang ba kan nion borbah ia ka Rangdajied, kaba hangne, ka jingiapher jong katta ka rukom ialehkai hi ka long, ba hynne ka janmiet, ka rukom ialehkai ka Langsning FC, lah ban ong ba ka la phiel lut jan ha baroh ki bynta kampher lad dei ha ka liang ka defence, ka midfield ne forward, ha kaba ka rukom ban pynbuh ia ka bol ne ban pashat sha la ki para ba ialehkai lang hapdeng ka madan ka long da shisha kaba sniew.
Wat la katta ruh, la wan ban mih paw ki kato katne ki kabu ksiar ia ka kynhun jong ka Langsning FC ban ioh wat ban thep ia ki kol, hynrei katta ka jinglong bym shym la pynkhreh ne pynleit jingmut, kine ki kabu ksiar kiba wan shaka baroh ki la shu bijai ei tad haduh ban da shah rem, haba la shem bad iohi ba la phiel katta ka rukom ialehkai, u Khlain Pyrkhat Syiemlieh kum u coach u la rai ban sei bujli player kum u Donlad Diengdoh bad u Samuel Phawa, kaba hangne ruh, kne ka buit kam shim la lah satia ba kan treikam.
Hynrei na ka liang ki player ka Rangdajied, katba nang jam shakhmat ka jingiakhun, katta ruh ki la nang skhem bha ka rukom ialehkai ka jong ki, kaba da kylla, ki iai bteng wat ban nion beit shakhmat ka rukom ialehkai ka jong ki.
Ha kum kane ka sur, ba ka kol kaba ar kaba u Stephanson u la ioh ban thep ka da long kaba itynnad bad kaba khlem da lah syndon ia u ban khur wat ia ka khusnam t7 Player of the Match, ryngkat ka song pisa kaba San hajar tyngka, ba la sam da u Secretary ka SSA bah D.L Nongbri.
