Shillong, Nohprah 08 : Ka Champion jong ka 1st Div Nongkseh SS&CC bad ka Langsning FC kin mih madan lashai ka sngi ban iakhun ha ka jingialehkai semifinal ba nyngkong ka SSA Champions Cup 2025, ka ban pyni ia ka kynhun kaba bit ka ban jam sha ka final.
Kane ka jingiakhun kan long ha ka por 4:30 baje janmiet ha madan SSA Stadium, First Ground, Polo.
Ha ka sngi kaba bud ka jingiakhun ia ka semifinal kaba ar kan long hapdeng ka Shillong Lajong FC pyrshah ia ka MLP FT.
Ka Langsning FC ka la buh jaka ialade sha kane ka kyrdan iakhun hadien ba ka la lah ba kan pynliem da 6-0 ia ka Mawkasiang.
Kum ka kynhun, ka Langsning FC ka skhem bha ha ka defend line, bad kala shah thep tang shi kol, na ki saw sien ialehkai ba ka la dep. Kane ka kynhun ka don jingkyrmen ba ka jingwan phai u Atlandon Kharmaw bad Manbhalang Nongmin kan nang pynkskhem shuh shuh ia ka jingialehkai ba shadien.
Shakhmat pat u Donlad Diengdoh u pynpaw ia ka mynsiem kaba sliang bad ba thrang bha ka jong u, katno tam lei lei ban lam khmat ia ka kynhun ban thep haduh lai kol (hat-trick) bad ban iarap lang da u Dajiedlang Wanshnong, Nelson Rymbai bad Wanshwadame Diengdoh.
Ka Nongkseh SS&CC, ka thaw ia ka rekod da ka jingbym pat shah rem na ki 13 sien ialehkai ka jong ka ha kane ka samoi ki lympung ialehkai ka SSA, ha kaba sdang shwa da ki 9 tylli ki jingjop ha ka lympung iakhun ka First Division, hadien kane ba kan jop lai sien bad iakhaid shisien ha ka Champion Cup. Ka Nongkseh kala lah ban pyniakhaid ia ka Champion jong ka Super Division-ka Shillong Lajong da mar shikol.
Kum ka kynhun naduh kaba sdang ka samoi ialehkai, ka don ia ki kato katne ki rang ialehkai kiba long shisha u budlum ne ki shot shan ia ka kynhun ha kaba ki da aiti shisha met bad mynsiem ialade bad kine ki long kum u Chesterpaul Lyngdoh bad u Hardy Cliff Nongbri, kiba tehlakam bad pynskhem bha ia ka bynta ba hapdeng, shakhmat pat u Kitboklang Pale bad u Kynsaibor Lhuid.
Katba ha ka liang ka kamram ban ap ia ka kol, u Daraphun Talang, wat lada um pat la dei than eh u player ba la san bad rangbah ka jingim ialehkai, hynrei ,u la lah pat ban ia don lang ryngkat bad ki rang ialehkai dien kum u Arlangky Nongsiej, Mebankhraw Wahlang bad Banpynkhrawnam Nongkhlaw ban pynskhem ia la ka jong ka kut.
Lah khmih lynti ba ka madan ialehkai kan shlei da ki nongkyrshan na baroh ar tylli ki kynhun bad ka Polo kan sawa jam da ki paidbah kiba ai mynsiem iala ki jong ki kynhun.
