Shillong, Naiwieng 25 : Ka Shillong Lajong FC kala pyni ia ka jinglong khraw ha ka rukom ialehkai pyrshah ia ka Mawkriah West ha ka Shillong Sports Association Champions Cup 2025 bad pynbam haduh 6-0 kol ia kane ka kynhun 2nd Division ha ka jingiakhun ba long ha ka sngi Ba-ar ha madan SSA, Polo.
Kane ka jingiakhun kala sakhi ruh ia ka jingioh hatrick ba nyngkong eh jong ka lympung, kaba la wan na u rang ialehkai ba shakhmat ka Shillong Lajong u Riborlang L Lyngkhoi, uba la ioh thep haduh 3 kol.
Kumjuh ruh ka Champion jong ka 1st Division-Nongkseh SS&CC kala ioh khur ia ka nam jop da ka jinglah pyliem ia ka Laitkyrhong da 1-0 kol.
Haba phai sha ka jingiakhun ka Nongkseh bad Laitkyrhong, kane ka kol jong ka Nongkseh kala wan haka por shuwa ba u fourth referee un ieng ban rah ia ka sleit-ka ba pyni ia ka por ba pynjlan ia ka jingiakhun.
Ia kane ka shi kol ka Nongkseh lah ioh thep da u kapten Hardy Cliff Nongbri lyngba ka jingshut corner-ka bol kaba la khun beit beit sha ka kol jong ka Laitkyrhong. U nongap kol bad ki rang ialehkai ba shadien ka Laitkyrhong kila shu ang tyngheng ia ka bol kaba la sam lyngba bad iohi satang ia ka jingkhih ka jar.
Hynrei u mawmer ka Nongkseh lada shim naduh ba ka sdang ban iakhun ia ka First Division, kane ka kynhun kam pat shym la shah rem bad ka dang bteng ban khur ia ka jingjop kaba la kot mynta sha ka 10 sien kynthih-9 sien ha ka 1st Division bad shisien, kaba dei ka sien ba nyngkong ha ka Champions Cup.
Haba phai pat sha ka jingiakhun ka Shillong Lajong FC bad ka Mawkriah, u Riborlang L Lyngkhoi u la ioh ban thep ia kine ki lai tylli ki kol ha ka minit kaba 25′, 28′, 39′, kliba long tang ha ka kylla step, bad ia ki kol kiba sah la thep ia ki da Ricky Kharkongor (74’), Willbeson Jaba (88’) bad Samchaphrang Lato (90’), ka la biang pura ia ka Shillon Lajong FC ka lahduh ka Super Cup ba kan pynliem noh ia ka Mawkriah West kaba dei ruh ka lahduh jong ka Third Division mynta ka snem.
Kane ka lympung ialehkai kan wanphai biang tad haduh ka sngi Palei jong ka taiew, ha kaba ka jingiakhun kan dei na ka Group A, ha kaba ka Umlyngka kan wan ban mih madan ban iakhun pyrshah ia ka MLP FT kaban long ha ka por 1 baje nohphai sngi, bad ha ka por 4:30 janmiet ka Mylliem Lum kan iakhun pyrshah ia ka Langsning FC.
