Shillong, Naiwieng 25: Ki Pulit ka Shillong, kila kem ia uwei u samla jong kawei ka thei 26 snem Phidarisha Jyrwa, kaba khlad hadien ka jinghap na ka kali kaba iaid.
Ia kane la pyntip da u Superintendent of Police ka East Khasi Hills Bah Vivek Syiem ha ka sngi Ba-ar haba pyntip ba ia une u samla la pyllait noh da ka bah jamin.
Kane ka jingjia kala jia ha ka 7 tarik Naiwieng ha ka por 11:50 baje mynmiet.
“Ia kane ka thei samla (Jyrwa) la leit shaw da u samla na ka jaka iathoh ha All Saints bad nangne kila hiar sha ka surok Police Bazaar hynrei haba poi hajan ka Ophis DC, kane ka thei samla kala hap napoh ka kali kaba iaid. Ki don ki briew kiba sakhi ia ka jinghap kane ka samla na ka kali” ong u Bah Vivek haba iakren bad ki nongthoh khubor.
“Kane ka thei samla kala khlad noh ha ka 13 tarik Naiwieng ha Woodland Hospital. Ngi la ioh ia ka medical report ia ka daw ka jingiap ruh kaba dei namar ka jingmynsaw u budlum” ula bynrap.
U SP ula pyntip ba une u samla, uba niah ia ka kali, la kem noh da ki Pulit bad la pyllait pat da ka bah jamin. Ia ka kali ruh la kurup noh da ki Pulit.
“Ia mynta ka jingtohkit ka dang iaid ban pynthikna la kane ka jingjia ka dei kaba shu jia ryngkhat lane ka dei ka jingniah kali khlem akor lane ka don kano kano ka jingthmu ban bret ia kane ka thei samla na ka kali” ong u Bah Vivek haba bynrap ba ki Pulit ki dang bishar ia ki video CCTC, ia ki jingbatai jong u (statement) namar ki don shibun kiei kiei kiba hap ban tip.
U hynmen jong kane ka thei samla ula ujor da ka ejahar ha ka 10 tarik Naiwieng.
