Shillong, Nohprah 10: Ka Shillong Lajong FC ka la jop da kaba suk ia ka MLP FT da 2-0 kol, ha ka jingiakhun ia ka semifinal kaba ar, ka SSA Champions Cup , ba long hynne ka janmiet sngi Balan.
Da kane ka jingjop, ka Shillong Lajong kan iakhun pyrshah ia ka Nongkseh SS&CC, haka phainal ban iaknieh ia ka nam kum ka Champion jong ki Club, ha ka sngi Saitjain jong ka taiew.
Ia kine ki artylli ki kol ka Shillong lajong FC, la thep ia ki da u Iohborlang L Lyngkhoi (41′) bad Deibormame Tongper (50′).
Wat lada ka kynhun ialehkai ka MLP FT kam shim la lah ba kan ialehkai bha, pynban u Nister Roy Suting ba dei artad u rang ap kol u jong ka, u la lah ban ieng iada bha ia la ka jong ka kol, ban nym ailad ia ki khynnah ka Lajong ban ioh ban thep suk ia ki kol na ki kabu ksiar ba ki la wan shaki.
Ki bol kiba u Nister u la ieng ban iada tyngeh ha kane ka janmiet jong kane ka jingiakhun kidei ki jingpyrshang kiba la mih paw na u Iohborlang bad kumjuh na u Babysunday Marngar.
Wat la katta ruh u sawar ka nam ialehkai kaba bha ka wan na ki khynnah ka Lajong, ha kaba kine ki artylli ki kol ba kane ka kynhun kala ioh ba kan thep, ki long kiba itynnad bad kiba dei shisha na ka jinglah ban ia mir bha hapdeng ki player ba shakhmat ki jong ka, ha kaba ka kol ba nyngkong ka dei ka freekick ba la shut da u Iohbor, kaba sam lyngba ia ka kynroh briew ba la ieng ka MLP.
Ka kol kaba ar ka la wan hadien u Riborlang L Lyngkhoi marwei u la ioh ban rah sted shakhmat ia ka bol kaba ha ka khyllipmat kaba biang dain u la khyrwit jam ia ka bol kaba pynlong ia u Nister ba un nym lah ban kem ia ka bad kane ka bol, ka la poi hajan ki kjat jong u Deibormame bad pynpar pat ia ka sha lyndet jong ka kol.
Kum ka kynhun ka MLP ka don ha ka ia ki rang ialehkai kiba khlain, hynrei kim shym la lah pat ban pynkhih win ia ka kut ialehkai ka Lajong, ha kaba ka kabu ksiar kaba paw shynna ia kane ka kynhun ka dei ka freekick ha ka minit kaba 63 ba la shut ia ka da u Everstarly Rynjah, kaba wat ka la sam lyngba ia ka kynroh briew ka Lajong hynrei ka bol kan shu lait salit ban pynkhih ia ka jar.
Ha kane ka janmiet jong ka jingiakhun, ka nam Player of the Match ka leit sha u Iohborlang L Lyngkhoi , ha kaba u la ioh ban pdiang ia ka momento lem bad ka song pisa kaba long san hajar tyngka na u Chief Secretary barim ka sorkar jylla bah D.P Wahlang.
Kumba la kdew haneng, ka phainal kan long la sngi Saitjain ha ka por 4:30 janmiet ha SSA Satdium, ha kaba kum ki kynhun, kine baroh artylli ki team ki la dep ba kin ia aireng teng hapdeng para maki, ha ka por ka jingiakhun jong ka group stage kaba la long ha ka 4 tarik mynta u bnai jong kane ka lympung.
Hangne la khmih lynti ba ki paidbah nongkyrshan na baroh ar kynhun, kin hiar ban pyndap hi smam ia ka stadium ka SSA bad kumjuh ruh na ki riew ieit phutbol, kiba hiar ban sakhi ia ka jingiakhun jong kine ki ar kynhun ban khmih mano napdeng jong ki ban long kita ki Champions of Champions.
