Shillong, Nohprah 03 : Ka kynhun ialehkai ka Mawkasiang bad ka Mawkriah West, ki dang don ha ka thong ban iaknieh rung sha ka kyrdan iakhun semifinal ha ka SSA Champions Cup 2025, kaba long ha madan SSA 1st Ground, Polo.
Kine ki arkynhun ialehkai kila poi ha kane ka thong da ka jinglah ban ioh khur ia ka jingjop ha ka jingiakhun ba long hynne ka sngi Balang. Ka Mawkasiang kala pynliem ia ka Umlyngka da 2-1 ha ka jingiakhun ka Group A katba ka Mawkriah West ka la pynliem ia ka Mawlynrei da 4-3, haka jingiakhun ka Group B.
Haba phai sha ka jingiakhun ka Mawkasiang bad Umlyngka, ia ki kol ka Mawkasiang la thep ia ki da Samlang Rympei (43’) bad Lamshai Jana (67), katba ia ka shi kol naka bynta ka Umlyngka la thep ia ka da u Babitlang Wahlang kaba wan ha ka dur ka penalty ha ka minit kaba 52.
Kane kan dei ka lai point ba nyngkong ia ka kynhun ialehkai ka Mawkasiang na kane ka lympung iakhun bad bynrap bad ka shi point ba ka la ioh ba kan khur lypa na ka jingiakhun kaba nyngkong, kaba pynlong ia ka ba kan ioh khur 4 point bad ba kan khreh ba kan iakhun pyrshah ia ka Langsning (kaba don 7 point). Lada ka Mawkasiang ka jop ia kane ka jingiakhun ka lah ban poi sha ka kyrdan iakhun jong ka semi (lada iaid bad ka jingkhien ka head-to-head).
Ha ka jingiakhun ka Mawkriah West bad ka Mawlynrei, u Enestar Malngiang (29’P, 40’, 51’), u la ioh ba un thep ia lai tylli ki kol bad sa shi kol la thep pat ia ka da u Calbessius Pathaw (38’) na bynta ka Mawkriah West.
Katba ia ki lai tylli ki kol ka Mawlynrei , ar tylli na kine kidei kiba la thep ia ki da u Alem Khongwir (67’, 79’) bad sa shi kol ka dei kaba la thep ia ki da u Ferdinand Pyngrope (17’)
Kane kan dei ka nam jop ba nyngkong ia ka kynhun ialehkai ka Mawkriah West bad ban ioh khur ia ka 3 point ba pura, ha kaba ka thong ia ka ban jam sha ka semifinal, kan shong pat na ka resol ka jingiakhun kaba lashai ka sngi hapdeng ka Nongkseh pyrshah ia ka Shillong Lajong FC.
Lada jia ba ka Nongkseh ka iakhaid, kane ka la biang pura ia ka ba kan buh jaka lem sha ka semifinal, hynrei lada jia pat ba ka shah rem, ka rai ia kane ka kynhun ban jam sha ka semi kan long haduh ka sngi Saitjain jong ka taiew ha kaba kan hap ba kan mih madan ban iakhun pyrshah ia ka Mawkriah West.
Nalor katta, ka kynhun ialehkai ka Laitkyrhong (3 point) ka lah ba kan ioh khur lem 6 point lada ka lah ba kan pynliem ia ka Mawlynrei ha ka jingiakhun kaban long ha ka sngi Thohdieng.
Lashai pat ka sngi ka MLP FT kan mih madan ban aireng pat ia ka Mylliem Lum ha ka por 1 baje nohphai sngi, bad ha ka por 4:30 janmiet, ka jingiakhun kan long hapdeng ka Nongkseh pyrshah ia ka Shillong Lajong.
