Shillong, Nohprah 06: Ki nongiathuhkhana, ki nongthoh kot bad poitri, ki nongdro bad ki nongtem nongput na kylleng ki bynta jong ka ri, kila ialum lang ha ka nongbah Shillong ban iashimbynta ha ka Spoken Festival kaba la long ha Nan Polok hynne ka sngi Thohdieng.
Kine ki nongiashimbynta na kylleng ka ri, kila iaroh ia ka jingshem ka jongki ha ka jingiashimbynta ha ka sien kaba nyngkong ha ka Spoken Festival.
Haba iakren bad u nongai khubor ka Shlem, u Director ka Festival Roshan Abbas ula ong ba ka jingthmu ban pynlong ia kane ka tamasa ka long ban wanrah lang ia baroh ki briew kiba don ia ki sap ki phong ha ki liang bapher bapher na ka nongbah Shillong bad ban sngap ia ki jingpynsngew ki jongki bad ban pynioh sngew pat sha kylleng.
“Ngim da iohsngew than ia ki khana nangne, Ngim da iohi than ia ki kam jong ki briew kiba nangne hynrei ka Bombay bad kiwei pat ki nongbah kila paw bha bad nga tharai ba ka kam jong ki briew hangne ka donkam ban pynsngew bad iohi shuh shuh” la ong u Abbas.
Ula ong, ba yn sa ialam ia ki nongthoh poitri ka jylla Meghalaya sha ka Spoke Fest kaban long ha Bombay ha u snem ban wan.
U Vancouver Shullai, u nongthoh poitri ula pule ia ka poitri kaba ula thaw kaba la ai kyrteng “Don Bosco Square”, ha kaba ula batai shaphang u Don Bosco Square ryngkat bad kiwei pat. U Vancouver ula batai ruh ia ka jingshem bad jingkordor jong ka nongbah Shillong kum ka jaka kaba kongsan.
Uwei na ki nongiashimbynta ula pynpaw ba ka long kaei kaei ka bym poi pyrkhat bad ka ong, “Kadei ka rynsan kaba ai mynsiem bad plie lad ban pyni ia ki sap ki phong na ka bynta kito kiba ym pat ju ioh ia ka lad ban pyni sha kiwei pat”.
