SPL | Pynliem ka Mawlai ia ka Laitkor bad kiew biang sha ka kyrdan ba  nyngkong

Shillong, Risaw 5:  Ka kynhun ialehkai ka Mawlai ka la lah ba kan law syndon war ia ka rabi jong ka nam rem ha ka kynhun ialehkai jong ka Laitkor bad kane ka la wan ba hynnin ka sngi Saitjain, ka la lah ba kan pynliem noh ia ka da 4-0, ha ka lympung ialehkai jong ka Shillong Premier League 2025, kaba la long ha SSA Stadium, First Ground, Polo.

Ia kine ki saw tylli ki kol ka Mawlai SC, la thep ia ki da u  Robertson Khongriah (45’), Ricky Chyne (60’), Loving Suting (77’) bad Damitre Kynjing (83’), kaba da kane ka jingjop, joit ka pynlong ia kane ka kynhun ba la coach ia ka da u bah Hering Shangpliang, ba kan kiew biang sha ka kyrdan ba nyngkong ha ka miej iakhein point, katta hadien ba ka la ioh ba kan khur 15 point, kham hakhmat ka kynhun ialehkai ka Nangkiew Irat kaba don ha ka kyrdan kaba ar, kaba la ioh ba kan khur 13 point, ka kyrdan kaba lai, ia mynta la bat ia ka da ka kynhun ka Shillong Lajong FC kaba la ioh ba kan khur 12 point.

Haba phai sha ka Laitkor, da kane ka namrem, kan iai neh ha ka kyrdan kaba 7 hadien ba ka la ioh ba kan khur 8 point.

Kumban shu pynkynmaw ba ka Mawlai ka wan rung sha kane ka jingiakhun hadien  ba lai sngi shwa kane ka jingiakhun ka la mad ia ka jingshah rem kaba long da 4-3 hakhmat ka Shillong Lajong FC, kaba jia long ba hadien ba ka la lah ba kan tam shwa da 3 kol, hynrei ha kaba kut ban mad pat ia ka namrem.

Katba na ka liang ka kynhun ialehkai ka Laitkor ka rung sha kane ka jingiakhun pyrshah ia ka Mawlai khlem shah rem ha ki lai tylli ki jingiakhun kiba ka la dep, ha kaba ar tylli na kine kidei kiba ka la lah ba kan iakhaid.

Ia ka syrwet jong ka rukom ialehkai bha ia ka Mawlai ka wan ba kan mih paw ha ka por ba ka la wan ba kan bteng ia ka kylla miet, kaba hangne hi la shem bad iohi ia ka rukom ialehkai kaba tbit bha jong ki player ha madan.

Wat la katta ruh na ka liang ka kynhun ialehkai ka Laitkor kam shim la pyndem satia ialade, ha kaba ka la iai pyrshang ba kan wanphai lem sha ka thong ka jingiakhun, hynrei kaba kut hi ka long ba kam shim la lah ba kan pynpra ia ka kut ialehkai kaba skhem jong ka Mawlai.