Shillong, Nailur 13 : Ka jingiakhun Super Saturday Match ka Shillong Premier League, hapdeng ka Shillong Lajong FC bad ka Langsning FC, ka la kut ha ka jingiakhaid da mar 2-2 kol, ha ka janmiet sngi Saitjain ha SSA Stadium, First Ground, Polo.
Ka Langsning FC kala lah ban tam shakhmat da ki ar kol hynrei ki rang ialehkai ka Shillong Lajong FC ki la beh nadien ban pynphai ia kine baroh ar kol, kaba la kut da ka jingia sam mar shi point.
Ha kaba kut jong kane ka jingiakhun, lada phai sha ka miej iakhein point, kam shim don kano kano ka jingktah, namar ka Shillong Lajong kan iai neh ha ka kyrdan kaba lai hadien ba ka la ioh ba kan khur 9 point, katba ka Langsning pat kan iai neh ha ka kyrdan kaba saw hadien ba ka la khur 8 point.
Haba phai sha ka jingiakhun, mar ia sdang, ka kynhun ialehkai ka Langsning FC, ki la sdang ban ñion bha bad bunsien ki la da pynsma ruh te tok tok da ka boot ia ki player ka Shillong Lajong FC, bad da kane ka sur ialehkai, u Dajiedlang Wanshong u la ioh ia ka kabu ban khyrwit jam bha ia ka bol ban pynkhih ia ka jar ha ka minit kaba 5.
Haba wan ban bteng ia ka kylla miet, ka Langsning ka bteng ban pyllait lut ia la ki ktang lyer ki jong ka tad haduh ba kan da ioh pat ia ka kabu ba kan thep ia ka kol kaba ar, kaba la wan lyngba ka corner, kaba la shut da u Nikelson Bina ha ka minit kaba 57.
Ar kol la shah tam bad ka jingdawa hi ka long ban lah ban iai neh ha ka thong ban iaknieh ia ka nam lahduh, ka Shillong Lajong kan donkam ba kan iakhun tyngeh, kaba hangne la shem ba ki rang ialehkai ki jong ka, ki la trei shitom bad ha ka minit kaba 62, u Riborlang L Lyngkhoi u la ioh ban thep ia ka kol, kaba long kum ka jingai mynsiem ia ka kynhun tad haduh ba wat lada la rah ia ka sleit ban pynjlan ia ka por jong kane ka jingiakhun, ba ka jingialehkai hi ka long kaba shyrkhei bha ha madan.
Ha ka minit ba u referee un khreh ban pynwai noh u to Mebannangkiew Thabah u la ioh ban pynkhih ia ka jar, kaba pynlong syndon ia ka Shillong Lajong FC ba kan lah ban iakhaid na kane ka jingiakhun.
Hadien ba u referee u la put pynwai ia kane ka jingiakhun, ki player ka Lajong kim lah ban da leh kmen kumba ki la jop ia kane ka jingiakhun, namar ban shah tam shakhmat da ar kol bad ban ioh ban pynphai kylla biang pat ia ki na ka jingiakhun kum ia ka kynhun ialehkai ka Langsning FC kam dei satia ka kam kaba suk.
Ka jingiakhun ha ka sngi Nyngkong jong kane ka lympung kan long hapdeng ka Mawlai SC pyrshah ia ka Mylliem SC, kaban long ha ka por 4:30 nohphai sngi.
