Shillong, Risaw 14: Ka kynhun ialehkai ka Lasngning FC, ka la pyndep lut ia baroh ki jingiakhun ha ka lympung ialehkai Shillong Premier League 2025 bad pynkut pynkut da ka jingjop kaba long da 5-0 pyrshah ia ka Malki SC, ha ka jingiakhun hynne ka nohphai sngi.
Ki player ka Langsning FC kiba la ioh ban thep ia kine ki kol long Samuel Phawa (35’, 40’), Donlad Diengdoh (74’) bad Nelson Rymbai (84’) bad bynrap da kawei pat ka own goal u Pynkhlainbok Wahlang (90’+4) ha kaba kut noh artad jong kane ka jingiakhun.
Kumta da kane ka jingjop, ka kynhun ialehkai jong ka Langsning FC ka ioh ba kan khur 20 point ba kynthup ia ki 6 sien ki jingjop, artylli ki nam iakhaid bad ban shah rem arsien.
Da kane ka jingjop, mynta ka kynhun ialehkai ka Langsning FC kan shong halor duh ha ka miej iakhein point jong kane ka lympung, tangba ka kynhun kaba bat ruh ia ka nam kum ka lahduh ka Shillong Lajong FC kaba la khur mynta 18 point, ka dang sah sa kawei ka jingiakhun ba kan pyndep, bud pat sa ka kynhun ialehkai ka Mawlai SC kaba la khur 15 point bad dang sah sa artylli ki jingiakhun.
Lada phai pat sha ka kynhun ialehkai jong ka Malki SC, ka namrem ka pynlong ia ka ba kan don ha ka kyrdan kaba 9 hadien ba ka la lah ba kan ioh khur tang 6 point, bad sah satang kawei ka jingiakhun ba kan pyndep.
Lashai ka sngi, ka jingiakhun kan long hapdeng ka Laitkor SC pyrshah ia ka Sawmer SC, kaban long ha ka por 4:30 nohphai sngi.
