Shillong, Lber 28 : Ka Liang Pyrshah Voice of the People Party (VPP) ha ka sngi Thohdieng, kala sospon ia u MLA ka North Shillong Bah Adelbert Nongrum ha ryngkat bad 4 ngut ki dkhot na ka bynta lai snem, namar ka jingkynnoh ba leh ia ki kam ba pyrshah ia ka party.
Ia kane ka rai la shim hadien ba ka State Executive Committee kala shong bishar bha ia ki jubab jong u MLA bad ki 4 ngut ki Nongialam- Snarbor Laloo, Imti Jamir, Wilstone Sohshang bad Richinbusiness Marwein-ia ka show cause notice bala phah sha ki ha ka 1 tarik Lber.
Ha ka shithi sha u Bah Adelbert, u Vice President ka VPP Dr Kara H Shen ula ong “Ngi shem ba ka jubab jong phi, ha ka jaka ban pynpaw ia ka jingsngewsih lane ban pdiang ia ka jingsngewkhia baal pynpaw, ka long pynban kaba pynksan, kaba ialeh pyrshah bad ka bym donn satia ia ka dak ka jingbabe ia ki kam kiba la shim ba ki long pyrshah ia ka bha ka miat jong ka party. Ka rukom jubab jong phi ia ka show cause notice ka nang pynpaw shuh shuh ia ka jingialeh pyrshah ia ka discipline bad ki nongrim ka party, kaba ym lah ban shu iehnoh”.
“Hadien ka jingiakren kaba sani bha, ka party ka shem ia ka jubab jong phi ba kam ai jinghun satia bad haba pyndonkam ia ka bor kat kum ka Article III, clause 5 jong ka riti treikam ka VPP, phi la shah sospon na ka party na ka bynta 3 snem naduh mynta” ula bynrap.
“Hapdeng kane ka por ba don hapoh ka sospon, phi dei ban sangeh ban bat ia kino kino ki kyrdan, ka jingkitkhlieh lane ka hok long dkhot hapoh ka party. Phim dei ban mihkhmat ia ka party ha kino kino ki rynsan. La bthah ia phi ban kiar ha kaban leh ia kino kino ki kam ki ban nang pynsniew shuh shuh iaka party”.
Ha ka shithi sha ki saw ngut ki dkhot ba shah sospon, u Dr Shen ula ong “Ha ka jaka ba phin kren ia ki jingsngewkhia bala pynpaw, ki jubab jong phi ki dei kiba pynksan, ba ialeh pyrshah bad ba kiar ban kubur ia ka jingleh bakla. Ka party ka shem ba ki jubab jong ki ki dei kibym pynhun bad bym lah ban pdiang.
Namar kata, kat kum ka Article III, Clause 5 bad Article XII jong ka riti treikam ka VPP, phi la shah sospon na ka party naduh mynta, katba dang ap ia ka rai ban dang shim da ka State Executive Committee”.
 ha ka sngi Thohdieng, kala sospon ia u MLA ka North Shillong Bah Adelbert Nongrum ha ryngkat bad 4 ngut ki dkhot na ka bynta lai snem, namar ka jingkynnoh ba leh ia ki kam ba pyrshah ia ka party.){kind=link}