Shillong, Nailur 28 : Ka kynhun ialehkai I-League bad kaba rung semi-phainal jong ka Durand Cup, 2024, ka Shillong Lajong FC, kala iasoi soskular iatehlok bad ka kompani Star Cement hynne ka sngi nyngkong ha ka jingialang kaba long ha Shillong.
Kum shibynta na ka jingiatreilang, ka Star Cement kan long ka nongbei pisa ia ka Shillong Lajong FC, ban ai ka jingkyrshan ba donkam ia ki prokram jong ka club, ki youth development program bad ki kam trei mon sngewbha ha ka imlang sahlang.
Haba kren ha ka jingialang, u COO ka Star Cement Pradeep Purohit ula ong “Ngi sngew sarong ban iatreilang bad ka Shillong Lajong FC bad phakhmat ban wanrah lang ia shibun kiei kiei kiba sngewtynnad, ban iatreilang, ai mynsiem bad wanrah ia ka jingkylla kaba don jingmut ia ki shnong ki thaw ha ka thain lyngba kane ka jingialehkai kaba itynnad”.
U Nabarun Chatterjee, Head of Sales ka Star Cement ula ong “Ka jingiatehlok jong ngi bad ka Shillong Lajong FC ka dei kasienjam ban pyniasoh bad ka imlang sahlang. Ngi phaikhmat ban kyrshan ia ki prokram kiban kyntiew ia ka jingialehkai phutbol bad ai mynsiem ia ki nongialehkai jong ki pateng ban wan ha kane ka thain”.
U Larsing LD Sawyan, Managing Director ka Shillong Lajong FC ula ong “ Ngi sngew burom ban don ka jingiadei bad ka kompani ba paw kum ka Star Cement. Ngi ngeit ba kane ka jingiatreilang kan iarap ia ka Lajong ban beh ia ka thong ha kaban nang lam shakhmat ia ka jingialehkai phutbol ha Meghalaya bad ha ka thain Shatei Lam Mihngi baroh kawei. Ka phutbol ha India kan iohnong bha.”
