Shillong, Jymmang 09 : Palat 34 hajar ngut ki Nongthep Vote jong ka Sohiong Constituency, kin ai ia ka rai lashai ka sngi ka 10 tarik Jymmang, ba mano napdeng ki 6 ngut ki kyrtong kiba la mih ban aireng ha ka elekshon MLA-2023, ki ban leit mihkhmat ia ka constituency sha ka Iingdorbar Thaw Ain ka Jylla
Ka jingiathep vote kan sdang naduh ka por 7 baje haduh ka por 4 baje. Haduh 34,783 ngut ki nongthep vote ha kaba 17,096 ngut ki shynrang bad 17687 ngut ki kynthei, kin iathep vote ha ki 63 tylli ki polling station ban jied iala u jong u nongmihkhmat ba thymmai.
Ia ka elekshon MLA ha Sohiong la pynkynriah shadien hadien ka jingkhlad ba kyndit jong u Myntri kam Pohiing barim bad kyrtong ka UDP Bah HDR Lyngdoh ha ka 20 tarik u bnai Rymphang.
“Haba iadei bad ki jingpynkhreh, baroh kila biang lut. Baroh ki Nongpyniaid elekshon kila poi shala ki jong ki polling station khlem kano kano ka jingeh bad kila pynkhreh bha ia ka jingiathep vote lashai ka sngi” ong u Chief Electoral Officer (CEO) Bah FR Kharkongor haba iakren bad ki nongthoh khubor hynne ka sngi Ba-ar.
Ula pyntip ba haduh 154 ngut ki badei ki nongthep vote bala noh rta bha, kiba la kynjoh ia ka 80 snem bad palat katba 54 ngut ki dei ki nongthep vote kiba don jingduna ha ki dkhot met, kila dep ban thep ia ki vote jong ki nala ki jong ki Iingsah.
Haba kylli, u CEO u pyntip ba kam shym la don satia kano kano ka jingai khubor ba ka don ka jingpynkhein ia ka silence period ne ka kynta ban sangeh ia ka jingialap elekshon, kaba sdang treikam naduh hynnin ka janmiet.
U CEO u pyntip ba haduh 5 pyrton ki CAPF kila don mynta na ka bynta ban pahara ia ka elekshon.
Ha ka model polling station ha Nongpathaw, u Bah Kharkongor u iathuh ba ha ka sien ba nyngkong eh, ki nongthep vote kin iashimbynta ruh ha ka jingthung tynrai dieng.
Haba kylli, u CEO ula ong ba ha ki snem bala leit noh, ka Sohiong ka ju kot haduh 90% ha ka jingpoi ki nongthep vote. “Ngi kyrmen ba ha kane ka kynti, ka jingpoi ki nongthep vote kan kynjoh ia ka 90% bad tam. Lada ka suin bneng ka bha, ka Sohiong ka lah ban poi biang sha ka 90% tam ha ka jingpoi ki nongthep vote”.
Ha kajuh ka por, u CEO ula pyntip ba ka jingpynkhreh ia ka jingniew vote ruh kala iaid shaid shaid. Ka jingniew ia ki vote kan long ha State Central Library ha ka 13 tarik u Jymmang.
