Shillong, Lber 16 : Ka Sorkar Jylla ka lah ban pynmih jingpynbna thynmai ban wad bad thied jaka na ka bynta ban pynlong jaka theh niut ka sor Jowai.
U Symbud Myntri Rangbah ba khmih ia ka Tnad Pynroi sor Bah Sniawbhalang Dhar hynne ka sngi palei ula ong ba ka Tnad kan la pynmih jingpynbna biang bad ki trai jaka kila phah ia ki jingtyrwa jong ki.
“Hynrei, bun na ki jaka ki dei ki bym iahap (ban pynlong jaka theh niut)” ong u Bah Sniawbha haba iakren bad ki nongthoh khubor.
Ula pyntip ruh ba ka Tnad kan sa pynbna noh mardor ia u Chairman ba thymmai jong ka Jowai Municipal Board (JMB).
U Bah Sniawbha ula ong ba un sa shim rai hapoh kane ka taiew halor kane ka kam. “Lada ki aplikashon bala ioh kim iahap satia, ngan pynmih da kawei ka jingpynbna ban thied jaka” ula ong haba bynrap ba ia kum kane ka rai un sa shim ruh haba iadei bad ka Marten ha Mawlai Mawiong.
Lah ban kdew hangne ba ka sor Jowai kala shah ktah jur na ka jingbym don ka jaka theh niut ba shirta la bun bun bnai mynta.
Haba kylli, u Symbud Myntri Rangbah ula pynpaw ia ka jingsngewskhem ba ka Tnad jong u kan lah ban weng noh ia ki jingeh haba iadei bad ki jaka theh niut.
“Wat khuslai, ka don beit ka lynti ban pynbeit ia baroh ki jingeh hynrei ka lah ban shimpor” ula ong.
Ha u snem bala lah, u Bah Sniawbha ula pyntip ba ka Sorkar ka don jingthmu ban wanrah ia ki jaka theh niut kat kum ka juk saian ha baroh ki District ka Jylla.
Kat kum ka jingong jong u, donkam ia ka jaka ba 200 acre ban buh ia ka jaka theh niut ba thynmai ha Shillong katba 50-100 acre ka jaka ba donkam ha kiwei ki district ka Jylla.
