Shillong, Nohprah 17 : U President ka Meghalaya National People’s Party (NPP) bad Symbud Myntri Rangbah ka Jylla Bah Prestone Tynsong ha ka sngi Ba-ar, ula pynpaw ia ka jingsngewskhemba ki paidbah ka Ri-lum Khasi bad Jaintia kin kyrshan ia ka Sorkar ‘double engine’ ha ka elekshon MDC ban wan sha ka Iingdorbar ka KHADC bad JHADC, ka ban long la 21 tarik Rymphang, 2025.
Haba kren sha ki lad pathai khubor, u Bah Prestone ula ong ba ka NPP kala pynkhreh shaid shaid ialade ban leit sha ka elekshon ADC. Ka Party kala dep ban pynbna ia ka thup ba nyngkong jong ki 18 ngut ki kyrtong ha KHADC bad 20 ngut ha JHADC.
“Ki don katto katne ki constituency, kiba ngin dang ban pynbna ia ki kyrtong. Hynrei, nga kyrmen ba hapoh ka 10 tarik u Kyllalyngkot, ngin sa pyndep ia baroh ki kam ba iadei bad ka jingpynbna ia baroh ki kyrtong ki ban aireng ha kane ka elekshon ki artylli ki ADC” ula bynrap.
Lah ban kdew hangne, ka NPP ka dei kaba ialam ia ki Executive Committee ha baroh artylli ki ADC-ka KHADC bad JHADC.
Haba kren halor ki jingjop jong ka party, u Bah Prestone ula ong “Nga sngewskhem ba ki briew kin vote ia ka Sorkar ‘double engine’ ha kane ka elekshon ADC ban wan”.
“Nga sngewskhem ba ki briew kin khmih ia ka jingtreikam jong ka Sorkar ba ialam da ka NPP. Ki ishu kiba ki Sorkar barim kim shym la lah ban leh eiei, mynta la lah ban pynbeit bad leh eiei da kane ka Sorkar ba mynta hapoh ka jingialam jong u Myntri Rangbah Conrad K Sangma” ula ong.
“Phi la iohi dangshen u Symbud Myntri Rangbah Bah Sniawbhalang Dhar ula buh ia u mawnongrim ban sdang pyntrei biang ia ka Iew Iawmusiang, kaba la shu ieh da ki bun snem bad mynta la bthah ban pyntrei noh mardor ia ka kam. Kumta, ki briew mynta kila sngewthuh bha ba ka jingkyrshan ia ka NPP kan wanrah tang ia ki jingmyntoi bad ka jingvote biang ia ka party ban wanphai sha ka bor ka long kumba don ka Sorkar ‘double engine’ ha kaba ki ADC kin iatreilang bad ka Sorkar na ka bynta ka roi ka par baroh” ula bynrap.
U Bah Prestone ula kynthoh “Balei ka NPP ka iatreilang bad ka Sorkar NDA ba ialam da ka BJP, kam dei satia namar ba ka ieid ia ka BJP lane ngi kyrshan ia ki mat treikam jong ka hynrei ngim don lynti pat da kumwei namar ka dei kaba ialam da ka Sorkar…Ngi donkam ia ka jingkyrshan ka Sorkar ban pynthikna ia ka jingwan tuid ki kam pynroi ne ban nym sahkut ka jingwan tuid ka um sha Jylla. Hynrei, ki don pat kito kiba pyrshang ban ialam bakla ia ki paidbah da kaba ong ba wat vote ia ka NPP namar ka dei ka ka BJP. Kane ka dei kaba bakla bha”.
Haba batai antad ba ki paidbah kin nym vote haba pynshong nongrim iaka jingbeh ka lyer, une u President ka NPP ula ong ba ka party kala jop kput bha ha ka elekshon shiteng samoi ba dang shu dep ha Gambegre wat hapdeng ka jingshah rem ha ka elekshon Lok Sabha.
“Ngi la iohi ba ki paid nongthep vote ka Gambegre kila buh hakhmat ia ka roi ka par ym ka jingbeh ka lyer, ka jingthiang u thylliej ne ka jingsngewbang ki jingrwai elekshon” ula ong.
Haba iaroh ia ka jingtreikam jong ka party, u Bah Prestone ula ong “Ngi la buh shibun ki maw nongrim ym ban shu pynbiejia ki paidbah hynrei ngi la buh ia u mawnongrim da ka jingkut jingmut ban pyndep ia ki project naba kin ai shibun ki jingmyntoi ia ki paidbah ka Jylla”.
U DYCM ula pynpaw ruh ba u don ka jingngeit kaba skhem ba ki paidbah kin ai biang ia ka jingshaniah ha ki kyrtong ka NPP bad ban pynthikna ba ka party kan ioh thaw biang ia ka EC ha baroh artylli ki ADC.
 bad Symbud Myntri Rangbah ka Jylla Bah Prestone Tynsong ha ka sngi Ba-ar, ula pynpaw ia ka jingsngewskhemba ki paidbah ka Ri-lum Khasi bad Jaintia kin kyrshan ia ka Sorkar ‘double engine’ ha ka elekshon MDC ban wan sha ka Iingdorbar ka KHADC bad JHADC, ka ban long la 21 tarik Rymphang, 2025.){kind=link}