Shillong, Rymphang 06 : U Nongialam ka BJP bad kyrtong ka South Shillong Bah Sanbor Shullai, ula ong ba ka Elekshon MLA-2023 kan dei ka elekshon ba un jop da kaba suk namar ka jingbym don ki kyrtong kiba khlain.
U Bah Sanbor ula pyndep ia ka jingthep kyrteng hynne ka sngi nyngkong kum u kyrtong bad la synran ia u da ki Nongialam bad ki Nongkitkam ka BJP na kylleng ki jaka ka Constituency, kiba la iaid daka rally shaduh ka Ophis u Deputy Commissioner.
“Ngan jop da kaba suk ha kane ka elekshon 2023 namar kim don ki nongiakhun pyrshah kiba khlain” ula ong haba kynthoh ba ka NPP kam shym la pynieng kyrtong na South Shillong namar ba kam ioh satia ia ki kyrtong kiba biang.
Halor ki jingkynnoh ba u khlem pyntreikam bha ia ki skhim hapoh ka constituency, u Bah Sanbor ula ong “I Kong Angela Rangad ila shu kynnoh thok. Ila thok bad ki paidbah ka constituency kila sakhi ba baroh kila nang jam sahkhmat”.
U Bah Sanbor ula pynpaw ruh ba ki paidbah ka Jylla kila sdang ban pdiang ia ka BJP hadien ka jingiohi ia ki kam ba bha ba la leh da u Myntri Rangbah Duh Narendra Modi bad ruh ba bun ki skhim kiba la pynkha da ka BJP, la pyntreikam ruh hangne ha Jylla Meghalaya.
“Baroh ki skhim la ki dei ki skhim umbam, tan bording, k surok, ki jaka sumar, ka pule dangle bad kiwei kiwei, ki dei kiba la bei tyngka da ka sorkar Pdeng ba ialam da ka BJP. Kiwei ki party kum ka NPP bad ka NPP ki im tang ha Meghalaya. Ki paidbah ki dei ban tip ba ka Sorkar Pdeng ka dei kaba ialam da ka BJP. Ki dei ruh ban tip ba ki skhim ki dei kiba wanrah da ka BJP” ong u Bah Sanbor.
Halor ka jingkam ka Congress ba ki paidbah ka Jylla kin nym shaniah ia ka BJP namar ka jingthombor pyrshah ia ki Khristan, u Bah Sanbor ula ong “Ki dei tang ki jingkynnoh. Kam don satia ka jingthombor ia ki Khristan ha Meghalaya. Ka BJP kum ka party ka long kaba la khreh ban ialam bad leit sha Delhi ban iakhun na ka bynta ka jingbishar hok bad ka jingshngain jong ki Khristan”.
Halor ka jingdawa ia ka ILP, u Bah Sanbor ula ong ba ai ba ki briew kin ai rai sha ka BJP bad lada ki lah ban ai 31 ngut ki MLA ba kin lah thaw sorkar, ngin sa shong ban iakren.
“Kat kum ka riti synshar ka Ri, lada ka dei ka hok jong ki paidbah jong ka Jylla, baroh kiei kiei yn sa pynurlong” ula ong.
